જલપરી સેક્શનમાં 'નો એન્ટ્રી'માંથી પ્રવેશ મુદ્દે મારામારી

રોયલ મેળાના જલપરી સેક્શનમાં પ્રવેશ મુદ્દે મુલાકાતી અને મહિલા સિક્યુરિટી ગાર્ડ વચ્ચે થયેલી બોલાચાલી બાદ મામલો ઉગ્ર બની છૂટા હાથની મારામારી સુધી પહોંચ્યો હતો. ઘટનાના પગલે મેળામાં ઉત્તેજના છવાઈ ગઈ હતી અને પોલીસ ની મદદ લેવાની ફરજ પડી હતી.

ગઈકાલે રાત્રે પાદરા અને વડોદરાના પરિવારના આશરે ૧૫ સભ્યો મેળામાં ફરવા ગયા હતા. મુલાકાતી પરવીનબેનનો આક્ષેપ છે કે, અમારા પરિવાર પર ખોટી રીતે હુમલો કરાયો છે. મહિલાઓ સાથે પણ ઝપાઝપી કરી છે. જલપરી વિભાગમાંથી બહાર નીકળ્યા બાદ અમારા બે બાળકો અંદર રહી ગયા હોવાથી તેમને લેવા માટે જઈ રહ્યા હતા. તે સમયે અમારી પર પાઈપ વડે હુમલો કરી પાંચથી છ લોકોએ મારામારી કરી છે.

મહિલા સિક્યુરિટી ગાર્ડ મનીષા રાણાનું કહેવું છે કે તે લોકો નો એન્ટ્રી તરફથી અંદર પ્રવેશતા તેમને રોકતા મારી સાથે ઝપાઝપી કરી ગાળો આપી છે. મને છોડાવવા માટે જલપરી સેક્શનના અન્ય લોકો વચ્ચે પડતા ટોળાએ તેમના પર પણ હુમલો કરતા બચાવમાં પ્લાસ્ટિકનો પાઈપ ઉગામવો પડ્યો હતો.

રોયલ મેળાના સંચાલકો હેમરાજ મરે અને હિતેશભાઈનું કહેવું છે કે નો એન્ટ્રીમાંથી પ્રવેશ કરવા બાબતે મહિલા સિક્યુરિટી ગાર્ડ સાથે ટોળાએ ઝઘડો કર્યો હતો. મેળો બંધ કરાવી સળગાવી નાખવાની પણ ધમકી આપી હતી. મોટી સંખ્યામાં લોકો એકા થઈ જતા પરિસ્થિતિ તંગ બની હતી. આખરે પોલીસની ૧૧૨ ટીમને જાણ કરાઈ હતી.

રાવપુરા પોલીસે બંને પક્ષની ફરિયાદના આધારે આગળની કાર્યવાહી હાથ ધરી છે.