વડોદરાના રાવપુરા ચાર રસ્તા પર યુવકો વચ્ચે દંડા વડે મારામારી, વીડિયો વાયરલ

Vadodara Crime : વડોદરા શહેરના રાવપુરા ચાર રસ્તા વિસ્તારમાં ત્રણથી ચાર યુવકો વચ્ચે જાહેર માર્ગ પર દંડા વડે મારામારી થયાની ઘટના સામે આવી છે. આ ઘટનાનો વીડિયો સોશિયલ મીડિયામાં વાયરલ થતાં વિસ્તારમાં ચર્ચાનો વિષય બન્યો છે.

વાયરલ વીડિયોમાં યુવકો એકબીજા પર દંડા વડે હુમલો કરતા જોવા મળી રહ્યા છે. જાહેર રસ્તા પર જ મારામારી થતાં પસાર થતા લોકોમાં ભયનો માહોલ સર્જાયો હતો. કાયદો અને વ્યવસ્થાનો કોઈ ડર ન હોય તેમ યુવકોએ ખુલ્લેઆમ ધિંગાણું મચાવ્યું હોવાનું ચર્ચાઈ રહ્યું છે. 

ઘટના દરમિયાન નજીકમાં હાજર મ્યુનિસિપલ કોર્પોરેશનના સિક્યુરિટી ગાર્ડે વચ્ચે પડી બંને પક્ષોને છૂટા પાડી મામલો શાંત પાડવાનો પ્રયાસ કર્યો હતો. ઘટનાના પગલે વિસ્તારમાં થોડા સમય માટે ઉત્તેજનાભર્યું વાતાવરણ સર્જાયું હતું.

શહેરમાં આવા તત્વોને છૂટો દોર મળ્યો હોવાના આક્ષેપો વચ્ચે જાહેર સ્થળોએ સુરક્ષા વ્યવસ્થાને લઈને ફરી એકવાર પ્રશ્નો ઊભા થયા છે.