હિંમતનગર GIDCની ફેક્ટરીમાં સર્જાઈ મોટી દુર્ઘટના: લિફ્ટ તૂટી પડતાં યુવાનનું કમકમાટીભર્યું મોત

Fatal Factory Accident in Himmatnagar: સાબરકાંઠા જિલ્લાના હિંમતનગરની GIDCમાં આવેલી એક ફેક્ટરીમાં માલસામાનની હેરફેર માટે વપરાતી લિફ્ટ અચાનક તૂટી પડતાં કામ કરી રહેલા શ્રમિક યુવાનનું ઘટનાસ્થળે જ મોત નીપજ્યું હતું. લિફ્ટ છેલ્લા બે દિવસથી ખરાબ હોવા છતાં યોગ્ય મરામત કે તકેદારી રાખવામાં ન આવતાં આ જીવલેણ અકસ્માત સર્જાયો હોવાનું પ્રાથમિક વિગતોમાં બહાર આવ્યું છે.

જંતુનાશક દવાના બોક્સ લેવા જતાં કાળ આંબી ગયો

મળતી માહિતી અનુસાર, હિંમતનગર નજીક આવેલા પીપલોડી ગામનો એક આશાસ્પદ યુવાન રોજગારી મેળવવા માટે GIDCમાં આવેલી જંતુનાશક દવાઓ બનાવતી ફેક્ટરીમાં મજૂરી કામ માટે આવતો હતો. રોજની જેમ ગુરુવાર (28મી મે) દરમિયાન તે ફેક્ટરીમાં પોતાની ફરજ પર હતો. આ દરમિયાન તે ફેક્ટરીની અંદર જંતુનાશક દવાઓના પેકિંગ માટેના ખાલી બોક્સ લેવા માટે ગયો હતો.

ફેક્ટરીમાં માલસામાનની અવરજવર માટે રાખવામાં આવેલી લિફ્ટ છેલ્લા બે દિવસથી ટેકનિકલ ખામીના કારણે બંધ અથવા ખરાબ હાલતમાં હતી. યુવાન જ્યારે બોક્સ લેવા માટે લિફ્ટની નીચેના ભાગ તરફ કે નજીકથી પસાર થઈ રહ્યો હતો, ત્યારે જ અચાનક ઉપરથી આ વજનદાર લિફ્ટ ધડાકાભેર યુવાન પર ખાબકી હતી. લિફ્ટની નીચે કચડાવાના કારણે ગંભીર ઈજાઓ થતાં યુવાનનું લિફ્ટ નીચે દબાઈ જવાથી ઘટનાસ્થળે જ મોત નીપજ્યું હતું.

ઘટનાની જાણ થતાં જ મૃતક યુવાનના પરિવારજનો અને પીપલોડી ગામના સ્થાનિકો મોટી સંખ્યામાં ફેક્ટરી અને ત્યારબાદ હોસ્પિટલ ખાતે દોડી આવ્યા હતા. ઘરના કમાતા અને જુવાનજોધ દીકરાનો મૃતદેહ જોઈને પરિવારજનો પર આભ તૂટી પડ્યું હતું અને તેમના આક્રંદથી વાતાવરણ ગમગીન બની ગયું હતું.

આ પણ વાંચો: મિત્રને બચાવવા જતાં બંનેએ ગુમાવ્યા જીવ: વાવ-થરાદમાં ખેત તલાવડીમાં ડૂબવાથી બે શ્રમિકોના કરુણ મોત

પોલીસે હોસ્પિટલ ખસેડી તપાસનો ધમધમાટ શરૂ કર્યો

આ ભયાનક અકસ્માત અંગે ફેક્ટરી સત્તાવાળાઓ દ્વારા પોલીસને જાણ કરવામાં આવતાં સ્થાનિક પોલીસ કાફલો તાત્કાલિક ઘટનાસ્થળે દોડી આવ્યો હતો. પોલીસે લિફ્ટ નીચેથી યુવાનના મૃતદેહને બહાર કઢાવી, પંચનામાની વિધિ પૂર્ણ કરીને પોસ્ટમોર્ટમ (PM) અર્થે હિંમતનગરની સિવિલ હોસ્પિટલ ખાતે ખસેડ્યો છે. આ મામલે પોલીસે અકસ્માત મોતનો ગુનો નોંધી, ફેક્ટરીમાં સુરક્ષાના સાધનો અને ખરાબ લિફ્ટ અંગે રાખવામાં આવેલી બેદરકારી બાબતે તપાસ હાથ ધરી છે.