- માત્ર અનુમાનના આધારે સારવાર કરતો હતો
- તારાપુર પોલીસે એલોપેથીક દવાઓ, મેડિકલ સાધનો સહિતની મત્તા જપ્ત કરી ગુનો નોંધ્યો
તારાપુર : તારાપુર તાલુકામાં નાગરિકોના આરોગ્ય સાથે ચેડાં કરતા પાંચ જેટલા બોગસ ડૉક્ટરો ઝડપાયા હોવા છતાં આવા ગેરકાયદેસર દવાખાનાઓ ચાલુ હોવાની ઘટના ચિંતાજનક બની છે. સોમવારે રીંઝા ગામના મહાદેવ ફળિયામાં ડિગ્રી વગર એલોપેથીક સારવાર કરતો એક શખ્સ આરોગ્ય વિભાગ અને એસ.ઓ.જી.ની સંયુક્ત કાર્યવાહીમાં ઝડપાયો છે.
તારાપુર તાલુકા હેલ્થ વિભાગને બાતમી મળી હતી કે, રીંઝા ગામના મહાદેવ ફળિયામાં એક શખ્સ કોઈપણ પ્રકારની મેડિકલ ડિગ્રી વગર ડૉક્ટર તરીકે દવાખાનું ચલાવી રહ્યો છે. આ માહિતીના આધારે પી.એચ.સી. ખડા, તા.તારાપુરના મેડિકલ ઓફિસર અને એસ.ઓ.જી. આણંદ સંયુક્ત ટીમ દ્વારા બાતમી મળેલા સ્થળે તપાસ હાથ ધરવામાં આવી હતી. તપાસ દરમિયાન મહાદેવ ફળિયામાં આવેલી એક ઓરડીમાં દવાખાનું ચલાવતા એક શખ્સ મળી આવ્યો હતો. તેની ઓળખ મિલટોન ઉર્ફે મિલનભાઈ સુભાષ માધુ (મૂળ રહે. વેસ્ટ બંગાળ) તરીકે થઈ હતી, જે હાલ રીંઝા ગામમાં રહેતો હતો. પૂછપરછ દરમિયાન તેણે ડૉક્ટરની કોઈપણ ડિગ્રી કે પ્રમાણપત્ર રજૂ કરી શક્યો નહોતો.
ટીમે ઓરડીમાં તપાસ કરતાં ત્યાં સ્ટેથોસ્કોપ, બી.પી. માપવાનું મશીન, વિવિધ એલોપેથીક દવાઓ, ટેબ્લેટ, સીરપ તથા અનેક ઈન્જેક્શન મળી આવ્યા હતા. સાથે જ દર્દીઓની સારવાર માટે ખાટલા પણ ગોઠવાયેલા જોવા મળ્યા હતા. પોલીસે એલોપેથીક દવાઓ, મેડિકલ સાધનો સહિત રૂપિયા ૫૨૦૧નો મુદ્દામાલ જપ્ત કરી આરોપી બોગસ ડૉક્ટર મિલટોન ઉર્ફે મિલનભાઈ સુભાષ માધુ સામે ગુજરાત મેડિકલ પ્રેક્ટિસ એક્ટ, ૧૯૬૩ની કલમ ૩૦ અને ૩૫ હેઠળ ગુનો નોંધી વધુ કાર્યવાહી હાથ ધરી હતી.
આરોગ્ય વિભાગની કામગીરી પર સવાલો
૨૨ જાન્યુ.૨૬ના રોજ આ જ બોગસ ડૉક્ટર મિલટોન ઉર્ફે મિલન સુભાષભાઈ સાધુ (પ.બંગાળ) કોઈપણ જાતની મેડિકલ ડિગ્રી વગર રીંઝા ગામના ઓડ ફળિયામાં ભાડાના ઘરમાં દવાખાનુ શરૂ કરી સારવાર કરતા એક લાખથી વધુના મુદ્દામાલ સાથે ઝડપાયો હતો. જેની ફરિયાદ પણ તારાપુર પોલીસ મથકે નોંધાઈ હતી. બરોબર ૪૭ દિવસ બાદ ૯ માર્ચે ફરીથી આરોગ્ય વિભાગ અને એસઓજીની કાર્યવાહીમાં મિલટોન ઉર્ફે મિલન સુભાષભાઈ સાધુ(પ.બંગાળ) ઓડ ફળિયામાંથી જગ્યા બદલી મહાદેવ ફળિયામાં ગેરકાયદેસર દવાખાનુ શરૂ કરી સારવાર કરતો ઝડપાયો હતો. જેથી તેની સામે ફરી તારાપુર પોલીસ મથકે ગુનો નોંધાયો છે. જેને લઈ આરોગ્ય વિભાગની કામગીરી પર પણ સવાલો ઊભા થયા છે.
