કુંભારવાડામાં નકલી એન્જીન ઓઈલ બનાવતી ફેક્ટરીનો પર્દાફાશ

- લોકલ ક્રાઈમબ્રાંચે રૂ. 1.68 લાખના મુદ્દામાલ સાથે 2 શખ્સને ઝડપ્યા

- લૂઝ ઓઈલને બોટલમાં ભરી બ્રાન્ડેડ કંપનીના સ્ટિકર લગાવી નકલી એન્જીન ઓઈલનું વેચાણ થતું હતું

શહેરના કુંભારવાડા બાનુબેનની વાડી પીપરના ચોક સામે આવેલા પ્લોટમાં અમીત બચુભાઇ દવે (રહે.બારસો મહાદેવની વાડી, શિલ્પીનગરની પાછળ, કાળાનાળા) અને નિકુંજ શાંતિલાલ બારૈયા (રહે. શક્તિનગર, ટોપ થ્રી સર્કલ પાસે) ગેરકાયદેસર રીતે લુઝ ઓઇલમાંથી બ્રાન્ડેડ કંપનીના ઓઇલ બનાવી વેચાણ કરતા હોવાની બાતમીના આધારે લોકલ ક્રાઈમબ્રાંચે રેઈડ કરી તપાસ કરતા ઉક્ત શખ્સો બહારથી લુઝ ઓઇલ મંગાવીને તેને ઇલેક્ટ્રીક મશીન વડે મોટા ટીપણાંમાથી ૯૦૦ એમએલની બોટલમાં ભરી, કાઉન્ટર ટેબલ ઉપર ઢાંકણા ઉપર સીલ મારવાના મશીનથી સીલ મારી, બ્રાન્ડેડ કંપનીના એન્જીન ઓઇલના સ્ટીકર ચોંટાડી બ્રાન્ડેડ કંપનીના એન્જીન ઓઇલ તરીકે વેચાણ કરતા હોવાનું ખુલ્યું હતું. જે બાદ પોલીસે બન્ને શખ્સોને ૮૫ લીટર અને ૯૦ લીટર લુઝ ઓઇલ ભરેલ લોખંડના બે બેરલ તથા પ્લાસ્ટિકની બોટલો અને સ્ટીકરો મળી કુલ રૂ.૧,૬૮,૯૨૦ના મુદ્દામાલ સાથે ઝડપી લઈ આગળની કાયદેસરની કાર્યવાહી માટે બન્નેને બોરતળાવ પોલીસને સોંપ્યા હતા.

અમદાવાદથી નકલી ઓઈલ લાવી ગ્રામ્ય વિસ્તારમાં સપ્લાય કરતા હતા : પીઆઈ વાળા

શહેરના કુંભારવાડા વિસ્તારમાં નકલી એન્જીન ઓઈલની ઝડપાયેલી ફેક્ટરી મુદ્દે ભાવનગર લોકલ ક્રાઈમબ્રાંચના પીઆઈ એ.આ.વાળાએ જણાવ્યું હતું કે, બન્ને અમદાવાદથી નકલી ઓઈલ લાવી મશીનો મારફત બોટલોમાં ભરી તેમાં બ્રાંન્ડેડ કંપનીના સ્ટીકર લગાવી ગ્રામ્ય વિસ્તારમાં મોટા પ્રમાણમાં વેચાણ કરતા હતા.