વડોદરામાં ચૂંટણી જંગની શરૂઆત, દાવેદારોમાં ઉત્સાહ : નેતા બનવાની દોડ વચ્ચે જનતા પાણી-રસ્તા જેવી સુવિધાઓ માટે વ્યથિત

Vadodara Corporation : વડોદરા મ્યુનિસિપલ કોર્પોરેશનની આવનારી ચૂંટણીને લઈને શહેરમાં રાજકીય હલચલ તેજ બની છે. વિવિધ રાજકીય પક્ષોએ ઉમેદવારોની પસંદગી માટે સેન્સ પ્રક્રિયા હાથ ધરી છે. જેના પગલે ટિકિટ મેળવવા દાવેદારોમાં પડાપડી મચી ગઈ છે. એક તરફ નેતા બનવા માટે દાવેદારોમાં દોડ છે, તો બીજી તરફ જનતા મૂળભૂત સુવિધાઓ માટે તરસી રહી છે. હવે આવનારી ચૂંટણીમાં મતદાતાઓનો મિજાજ શું રહેશે તે જોવું રહ્યું. 

ટિકિટ માટે દાવેદારોનો રાફડો ફાટી નીકળ્યો છે. પ્રજાની સેવા અને શહેરના વિકાસના નામે અનેક આગેવાનો દાવેદારી કરી રહ્યા છે, પરંતુ અંદરખાને ગોડફાધરની શોધ, જૂથબંધી અને મતભેદો પણ સામે આવી રહ્યા છે. કેટલાક દાવેદારો માનતા રાખી ટિકિટ મેળવવા માટે ધાર્મિક આશરો પણ લઈ રહ્યા છે.

બીજી તરફ, શહેરની જનતા મૂળભૂત સુવિધાઓના અભાવે નેતાઓ પ્રત્યે નારાજગી વ્યક્ત કરી રહી છે. અનેક વિસ્તારોમાં દૂષિત પાણી અને અપૂરતા પુરવઠાની સમસ્યા વિકરાળ બની છે. ખાસ કરીને ઓજી વિસ્તારોમાં પાણી, ડ્રેનેજ, રસ્તા અને સ્ટ્રીટ લાઈટ જેવી સુવિધાઓ વર્ષો બાદ પણ પૂરતી ઉપલબ્ધ નથી. જેના કારણે અનેક સોસાયટીઓના રહીશોએ ચૂંટણી બહિષ્કારની ચીમકી આપી છે.

શહેરમાં ચાલી રહેલા રસ્તાના ખોદકામના કારણે રસ્તાઓની હાલત દયનીય બની છે. ટ્રાફિક વ્યવસ્થા કથળી ગઈ છે અને રાહદારીઓ માટે ફૂટપાથની સુવિધા પણ લગભગ નાબૂદ થઈ ગઈ છે. આ પરિસ્થિતિમાં ખાસ કરીને વેપારી વર્ગને ભારે મુશ્કેલીઓનો સામનો કરવો પડી રહ્યો છે.

પાછલા પાંચ વર્ષમાં ભારતીય જનતા પાર્ટીનું શાસન રહ્યું હતું, જેમાં હરણી બોટકાંડ જેવી દુર્ઘટનાએ શહેરને ઝંઝોળી નાખ્યું હતું. અનુભવહીન કંપનીને કોન્ટ્રાક્ટ ફાળવવાના કારણે 12 વિદ્યાર્થીઓ અને બે શિક્ષકોએ જીવ ગુમાવ્યા હતા. ઉપરાંત પૂરની પરિસ્થિતિએ પણ લોકોને ભારે નુકસાન પહોંચાડ્યું હતું.

વિકાસના નામે થયેલા કેટલાક પ્રોજેક્ટ્સ પણ વિવાદમાં રહ્યા છે. પૂર્વ અને દક્ષિણ વિસ્તારોમાં બનાવવામાં આવેલા સાયકલ ટ્રેકનો ખર્ચ માથે પડ્યો છે, જ્યારે ઉત્તર વિસ્તારમાં કરોડો રૂપિયાના ખર્ચે સાયકલ ટ્રેકનું નિર્માણ ચાલુ છે. આ કાર્યોમાં ભ્રષ્ટાચારના આક્ષેપો પણ ઉઠી રહ્યા છે.

વિપક્ષ કોંગ્રેસની સ્થિતિ પણ નબળી રહી છે. પાછલા બોર્ડમાં 76માંથી માત્ર 7 કાઉન્સિલર જીત્યા હતા અને તેમાં પણ જૂથબંધીને કારણે સત્તાપક્ષને ફાયદો મળ્યો હતો. બહુમતીના જોરે અનેક નિર્ણયો મંજૂર કરવામાં આવ્યા હતા.

સ્માર્ટ સિટી પ્રોજેક્ટ હેઠળ કરોડો રૂપિયાનો ખર્ચ થયો હોવા છતાં 24 કલાક પાણી જેવી મૂળભૂત સુવિધા હજુ પણ અધૂરી છે. સ્માર્ટ રસ્તાઓ ખખડધજ બની ગયા છે અને પીપીપી ધોરણના મોટાભાગના પ્રોજેક્ટ બંધ હાલતમાં છે.

આ તમામ પરિસ્થિતિ વચ્ચે ઉમેદવારો માટે આ ચૂંટણી સરળ નહીં રહે તે સ્પષ્ટ છે. અનેક વિસ્તારોમાં નાગરિકોનું કહેવું છે કે, ચૂંટણી જીત્યા બાદ નેતાઓ વિસ્તારમાં નજરે પડતા નથી. પરિણામે આ વખતે ઉમેદવારોને જનતાના આક્રોશનો સામનો કરવો પડી શકે છે.