એરપોર્ટ સર્કલ પાસે નશેબાજ કાર ચાલકે બે વાહન ચાલકને ટક્કર મારી

વડોદરા,મોડીરાત્રે એરપોર્ટ સર્કલ પાસે નશેબાજ  કાર ચાલકે બે વાહન ચાલકોેને ટક્કર મારી હતી. લોકોએ તેને ઝડપી પાડી હરણી પોલીસને હવાલે કર્યો હતો. આરોપી ક્યાંથી દારૃ પીને આવ્યો હતો તે અંગે  પોલીસે તપાસ હાથ ધરી છે.

ન્યુ વી.આઇ. પી. રોડ પર ટ્રાફિક સિગ્નલ બંધ હોઇ ટુ વ્હિલર લઇને ઊભેલા યુવકને પાછળથી કાર લઇને આવતા નશેબાજ કાર ચાલકે ટક્કર મારી હતી. આ ઉપરાંત અન્ય એક વાહન ચાલકને પણ ટક્કર મારી હતી. લોકોએ નશેબાજ કાર ચાલકને ઝડપી પાડતા તેણે લોકો સાથે બોલાચાલી કરી હતી. છેવટે પોલીસ આવતા કાર ચાલકની સામે ગુનો દાખલ કરી કાયદેસરની કાર્યવાહી હાથ ધરવામાં આવી છે.

ગઇકાલે મોડીરાતે એક યુવક ટુ વ્હિલર લઇને નોકરી પર જવા નીકળ્યો હતો. એરપોર્ટ સર્કલ નજીક ટ્રાફિક સિગ્નલ બંધ હોઇ યુવક ઊભો હતો. તે દરમિયાન પાછળથી આવતી એક કારના ચાલકે ટક્કર મારી હતી. ત્યાંથી ભાગેલા કાર ચાલકે આગળ વધુ એક વાહન ચાલકને પણ અડફેટે લીધો હતો. ત્યારબાદ લોકોએ કાર ચાલકને ઝડપી લીધો હતો. લોકોએ પોલીસને કોલ કર્યો હતો. પરંતુ, પોલીસ ૨૦ મિનિટ સુધી આવી નહતી. ત્યારબાદ પોલીસ આવી પહોંચતા નશેબાજ કાર ચાલક વિકાસ ભિકંદરાવ જાદવ (રહે. સોન વાટિકા સોસાયટી, આજવા રોડ) ની સામે ગુનો દાખલ કરી કાયદેસરની કાર્યવાહી હાથ ધરી છે.  કાર ચાલક ચાલુ કારે દારૃ પીતો હોવાની શંકાના આધારે પોલીસે તપાસ હાથ ધરી છે.

.

નશાની હાલતમાં કાર ચાલકે પોલીસ પર આક્ષેપ કર્યા

વડોદરા,

નશેબાજ કાર ચાલકે લોકો સાથે બોલાચાલી કરી હતી. નશાની  હાલતમાં તેણેે પોલીસ  પર જ ગંભીર આક્ષેપો કર્યા હતા. તેણે કહ્યું  હતું કે,  જસ્ટ વન એન્ડ હાફ પેગ. ગુજરાતમાં દારૃ વેચાય છે. તેની માટે પોલીસ અને વહીવટદારો જવાબદાર છે. ઉલ્લેખનીય છે કે, કારમાં  દારૃની બોટલ અને દારૃ ભરેલો ગ્લાસ પણ હતા. પોલીસનું કહેવું છે કે, દારૃની બોટલ ખાલી હતી. તેમજ ગ્લાસમાં દારૃ નહતો.