ડ્રીંક એન્ડડ્રાઈવ : કાર ડિવાઈડર સાથે ધડાકાભેર ભટકાઈ

શહેરમાં ડ્રીંક એન્ડ ડ્રાઈવના કિસ્સાઓ સતત વધી રહ્યા છે. ગઈકાલે રાત્રે લાલબાગ બ્રિજ નીચે પાણીની ટાંકી પાસે નશાની હાલતમાં ઇકો કારના ચાલકે વાહન પરનો કાબુ ગુમાવતા કાર ધડાકાભેર ડિવાઇડર સાથે અથડાઈ હતી. સદ્નસીબે આ અકસ્માતમાં કોઈ જાનહાનિ થવા પામી નથી.

ગઈકાલે રાત્રે અંદાજે દોઢ વાગ્યાના સુમારે લાલબાગ બ્રિજ નીચે ઇકો કાર ડિવાઇડર સાથે ભટકાતા કારનું આગળનું ટાયર છૂટું પડી ગયું હતું. ઘટનાની જાણ થતા પોલીસની ૧૧૨ ટીમ સ્થળ પર દોડી ગઈ હતી. તપાસ કરતા કારમાં બેઠેલા બંને શખ્સો નશાની હાલતમાં હોવાનું જણાયું હતું.

પોલીસે કારચાલક સુરેશકુમાર ગરાસિયા (રહે. રાજસ્થાન, હાલ રહે.પી.એસ.પી. કન્સ્ટ્રક્શન સાઈટ, લાલબાગ બ્રિજ પાસે)સામે પ્રોહીબિશન તેમજ વાહન અધિનિયમ હેઠળ ગુનો નોંધ્યો હતો. જ્યારે કારમાં બાજુમાં બેઠેલા વિશ્વજીતકુમાર શર્મા (રહે. બિહાર, હાલ રહે.પી.એસ.પી. કન્સ્ટ્રક્શન સાઈટ, લાલબાગ બ્રિજ પાસે) પણ નશાની હાલતમાં હોવાનું બહાર આવતા તેની સામે અલગથી પ્રોહીબિશનનો ગુનો નોંધ્યો હતો. નવાપુરા પોલીસે અંદાજે રૂ. ૩.૫૦ લાખની કિંમતની ઇકો કાર તપાસ અર્થે કબજે કરી છે.

શહેરમાં ડ્રીંક એન્ડ ડ્રાઈવ સામે પોલીસ દ્વારા સતત કાર્યવાહી કરવામાં આવી રહી છે, છતાં આવા બનાવો સામે આવતાં ટ્રાફિક સલામતી અંગે અનેક સવાલો ઉભા થાય છે.