ગુજરાતમાં તા. 2, 3 એપ્રિલે ફરી વીજળી, વરસાદ, વંટોળની ચેતવણી : ઉનાળામાં અસામાન્ય ઉપરાઉપરી પશ્ચિમી વિક્ષોભ : કચ્છમાં 52 કિમી ઝડપે પવન ફૂંકાયો, ગરમીમાં હજુ અઠવાડિયું રાહત રહેશે
રાજકોટ, : દેશમાં હાલ વેસ્ટર્ન ડિસ્ટર્બન્સ હવામાનને ડિસ્ટર્બ કરી રહ્યું છે અને વધુ એક તા. 2 એપ્રિલે પશ્ચિમોત્તર ભારત પર ત્રાટકશે અને આ સહિત ડઝનેક મોસમ પ્રણાલી સક્રિય થઈ છે તેના પગલે ગુજરાત સહિત દેશભરમાં ગાજવીજ, પવન સાથે કમોસમી વરસાદનો માહૌલ સર્જાયો છે. આજે અમરેલી જિલ્લામાં છૂટાછવાયા સ્થળે માવઠાં વરસ્યા હતા અને અન્યત્ર વાદળોની અવરજવર સાથે તીવ્ર પવન ફૂંકાયો હતો.
અમરેલી જિ.ના દામનગરમાં વિજળીના કડાકા ભડાકા સાથે કમોસમી વરસાદ વરસ્યો હતો તો લીલીયા પંથકમાં તેમજ ઠાસા, સુવાગઢ, ભટ્ટવદર, મુળીયાપાટ, સભડા સહિત ગામોમાં ઝાપટાં વરસ્યા હતા, સતત માવઠાંથી ખેડૂતોમાં ભારે ચિંતા જન્મી છે.
ભારતમાં હાલ ઉત્તર ઈરાન ઉપર કેસ્પિયન સમુદ્ર પાસે સાયક્લોનિક સર્ક્યુલેશન સાથે પશ્ચિમી વિક્ષોભ છે, પંજાબ , ઉત્તરપ્રદેશ, આસામ ઉપર સાયક્લોનિક સર્ક્યુલેશન તથા કર્ણાટક તમિલનાડુ, પંજાબથી અરબી સમુદ્ર સુધી તેમજ બિહારથી મણીપુર પૂર્વ-પશ્ચિમ એમ ટ્રફ છે, જેટ સ્ટ્રીમ પણ 96 નોટીકલ માઈલની ઝડપે ફૂંકાય છે જેના પગલે સમગ્ર દેશમાં સપ્તાહ દરમિયાન તોફાની વરસાદ રહેશે.
મોસમ વિભાગ અનુસાર ગુજરાતમાં આજે ઉપરાંત તા. 2, 3 એપ્રિલના પણ માવઠાંનું યલો એલર્ટ જારી કરાયું છે. તો કચ્છમાં ખાવડા ખાતે 52 કિ.મી.ની ઝડપે પવન ફૂંકાયો હતો. રાજ્યભરમાં હાલ તીવ્ર પવન ફૂંકાય છે અને આ સાથે ગરમીમાં રાહત હજુ અઠવાડિયું જારી રહેશે.
