Get The App

મને નથી ઓળખતો? ભાજપના જિ.પં. સભ્યનો રોફ : તા.પં. ઈજનેરની મારપીટ

Updated: Dec 30th, 2025

GS TEAM

Google News
Google News
મને નથી ઓળખતો? ભાજપના જિ.પં. સભ્યનો રોફ : તા.પં. ઈજનેરની મારપીટ 1 - image

જૂનાગઢ જિલ્લામાં સત્તાના મદમાં હુમલાનો બનાવ

ફોન પર ન ઓળખતા હોવા બાબતનો રંજ રાખી ભેસાણ તા.પં.ની લોબીમાં ઢીકાપાટુ મારી ફરજમાં રૂકાવટઃ ટીડીઓ અને સ્ટાફે છોડાવ્યા

જૂનાગઢ: ભેસાણ તાલુકા પંચાયતની બાંધકામ શાખાના અધિક મદદનીશ ઈજનેર ગઈકાલે ફરજ પર હતા ત્યારે જિલ્લા પંચાયતના ભાજપના સભ્ય અને અન્ય બે શખ્સોએ તેને ગાળો આપી ઢીકાપાટુનો માર મારી ગળુ પકડી મારી નાખવાની કોશિષ કરી હતી તેમજ ફરજમાં રૂકાવટ કરી હતી. ટીડીઓ અને અન્ય કર્મચારીઓએ આવી ઈજનેરને છોડાવ્યા હતા. આ અંગે ફરિયાદ થતા ભેસાણ પોલીસે વધુ કાર્યવાહી હાથ ધરી છે. આ ઈજનેરનો વાંક એટલો જ હતો કે ત્રણ-ચાર દિવસ પહેલા ફોન પર ન તે ભાજપના જિલ્લા પંચાયતના સદસ્યને ઓળખી શક્યા ન હતા! એ બાબતના મનદુઃખના કારણે મારપીટ કરાયાનું ફરિયાદમાં જણાવાયું છે.

આ અંગેની વધુ વિગત મુજબ જૂનાગઢના મધુરમ વિસ્તરમાં રહેતા અને ભેસાણ તાલુકા પંચાયતની બાંધકામ શાખામાં છેલ્લા અઢી માસથી અધિક મદદનીશ ઈજનેર તરીકે ફરજ બજાવતા વિશાલભાઈ શામજીભાઈ પોકર (ઉ.વ.૩ર)ને ત્રણ-ચાર દિવસ પહેલા બપોરના ફોન આવ્યો હતો જેમાં સામેથી પોતે કુમારભાઈ બોલું છે તેમ કહેતા ઈજનેર વિશાલભાઈએ કોણ કુમારભાઈ તેમ પૂછ્યું હતું આથી સામેથી 'તમે મને ઓળખતા નથી' તેમ કહેતા વિશાલભાઈએ ના પાડી હતી. આથી સામેથી 'તો તમે રહેવા દો' તેમ કહી ફોન કાપી નાખ્યો હતો. આ બાબતના મનદુઃખના કારણે ગઈકાલે વિશાલભાઈ ભેસાણ તાલુકા પંચાયતની હિસાબી ઓફિસમાંથી નીકળી તેની ઓફિસમાં જતા હતા ત્યારે લોબીમાં જીલ્લા પંચાયતના ભાજપના સભ્ય કુમારભાઈ બસીયા તથા બે અજાણ્યા શખ્સોએ ગાળો આપી થપ્પડ મારી હતી. બે અજાણ્યા શખ્સોએ વિશાલભાઈને પકડી રાખ્યા, જ્યારે કુમારભાઈએ આડેધડ ઢીકાપાટુનો માર માર્યો હતો. આ દરમ્યાન બુમાબુમ થતા ટીડીઓ તથા અન્ય કર્મચારીઓએ ત્યાં આવી વિશાલભાઈને છોડાવ્યા હતા ત્યારે કુમારભાઈએ 'હવે પછી ક્યાંય દેખાતો નહી નહીતર મારી નાખીશ' તેવી ધમકી આપી હતી. આ દરમ્યાન વિશાલભાઈ બચીને ભાગવા જતા કુમારભાઈ બસીયાએ તેનું ગળુ પકડી 'તને મારી નાખવો જ છે' તેમ કહી મારી નાખવાની કોશિષ કરી હતી.

ઈજાગ્રસ્ત અધિક મદદનીશ ઈજનેરને ભેસાણ સરકારી હોસ્પિટલમાં ખસેડાયા હતા. આ અંગે તેણે જીલ્લા પંચાયતના સભ્ય કુમારભાઈ બસીયા અને બે અજાણ્યા શખ્સો સામે ફરિયાદ કરતા પોલીસે ફરજમાં રૂકાવટ સહિતની કલમો મુજબ ગુનો દાખલ કરી વધુ કાર્યવાહી હાથ ધરી છે.