બજારોમાં દિવાળી ખરીદીનો માહોલ, ગત્ વર્ષ કરતાં 30 ટકા વધારે ખરીદીનું અનુમાન

વડોદરાઃ દિવાળી અને તેની સાથે જોડાયેલા તહેવારોનું કાઉન્ટ ડાઉન શરુ થઈ ગયું છે અને છેલ્લા બે દિવસથી શહેરના બજારોમાં દિવાળીની જોરદાર ખરીદી શરુ થઈ છે.જીએસટીના કારણે સેંકડો વસ્તુઓના ભાવ ઘટયા હોવાથી આ વખતે  દિવાળીની ખરીદી પણ વધારે થાય તેવો અંદાજ મૂકાઈ રહ્યો છે.

આજે રવિવારની રજા હોવાથી શહેરના એમજી રોડ, રાવપુરા રોડ, મંગળબજાર, નવા બજાર જેવા વિસ્તારોમાં સવારથી જ ઘરાકી જોવા મળી હતી અને સાંજ પડતા તો પગ મૂકવાની જગ્યા ના મળે તેવી સ્થિતિ સર્જાઈ હતી.

વડોદરા વેપાર વિકાસ એસોસિએશનના પરેશ પરીખનું કહેવું છે કે, આ વખતે ઘરાકી નીકળવાની આશાએ વેપારીઓએ સારો એવો સ્ટોક કર્યો છે.ગત વર્ષ કરતા આ વર્ષે ૩૦ ટકા વધારે ખરીદી  થાય તેવો અંદાજ છે.હવે બેસતા વર્ષની પૂર્વ સંધ્યા સુધી એટલે કે તા.૨૧ ઓકટોબર સુધી બજારમાં આ જ પ્રકારની ઘરાકી રહેશે...

દરમિયાન દર વર્ષની જેમ ચાર દરવાજા વિસ્તારમાં ટ્રાફિક જામ પણ થવા માડયો છે.બજારો મોડે સુધી ખુલ્લા રહેતા હોવાથી અને  મુખ્ય રસ્તા પર જ તંત્રની રહેમ નજર હેઠળ લારી, ગલ્લા અને પથારાવાળાના દબાણઓ હોવાથી તથા રીક્ષા ચાલકો મુખ્ય રસ્તા પર જ ઉભા રહેતા હોવાથી વાહન ચાલકો અને ખરીદી કરવા આવનારા પણ અટવાઈ રહ્યા છે.ટ્રાફિક જામના કારણે ચાર દરવાજા વિસ્તારમાં પ્રદૂષણ પણ વધી ગયુ છે.