- મોડી રાત્રે ફટાકડાંની આતશબાજીથી આકાશ ઝળહળશે
- પડતર દિવસને કારણે નવા વર્ષમાં વિલંબ થશે દિવાળીની પૂર્વ સંધ્યાએ બજારોમાં ખરીદી માટે ભીડ
અમદાવાદ : તહેવારોના મહાપર્વ દિવાળીની આવતીકાલે ચરોતરમાં ધામધૂમથી ઉજવણી કરવામાં આવનાર છે. ત્યારે છેલ્લે છેલ્લે પણ બજારોમાં દિવાળીની ઘરાકી જામી હતી. સામાન્યરીતે વર્ષના અંતિમ દિવસ દિવાળી બાદ તરત જ નવું વર્ષ શરૂ થઇ જતું હોય છે પરંતુ આ વખતે પણ છેલ્લા બે વર્ષની જેમ ધોકો એટલે કે, પડતર દિવસ વચ્ચે આવે છે જેના કારણે નવા વર્ષમાં એક દિવસનો વિલંબ થશે. નગરજનો નવા વર્ષને વધાવવા આતુર છે અને અનોખો થનગનાટ પણ તેમનામાં જોવા મળી રહ્યો છે.
આજે દિવાળીની રાત્રે ફટાકડાના અવાજથી આણંદ અને ખેડા જિલ્લા ગૂંજી ઉઠશે. વર્ષના અંતિમ દિવસે તેમજ બેસતા વર્ષે મંદિરોમાં અન્નકૂટ સહિતના ધાર્મિક કાર્યક્રમો યોજાશે. ધારણા કરતા સારૂ ચોમાસું અને દિપોત્સવી પર્વ દરમિયાન બજારોને નવો બૂસ્ટર ડોઝ મળ્યો છે ત્યારે આજે સોમવારે ચરોતરના આણંદ અને ખેડા જિલ્લામાં પ્રકાશ પર્વ તરીકે ઓળખાતા પર્વાધિરાજ પર્વ દિપાવલી પર્વની સવારથી મોડી રાત્રિ સુધી ઉજવણી કરાશે. દિવાળીની પૂર્વ સંધ્યાએ રવિવારે કાળી ચૌદશ હોવાથી બપોર બાદ ફટાકડા બજારમાં ધૂમ ઘરાકી જોવા મળી છે.
વતનથી દૂર રહેતા અનેક પરિવારો દિપાવલી પર્વની ઉજવણી કરવા વતનમાં આવતા શહેરી અને ગ્રામ્ય વિસ્તારના પરિવારોમાં ખુશાલી છવાઈ છે. દિવાળી પર્વને આવકારવા અનેક પરિવારને આંગણામાં રંગોળીઓ સજાવી છે. ફટાકડા બજાર ઉપરાંત મીઠાઈ બજારને પણ નવો બૂસ્ટર ડોઝ મળ્યો છે. પ્રકાશ પર્વની પૂર્વ સંધ્યાએ પણ ફટાકડાની આતિશબાજી જોવા મળી હતી. રવિવારે પ્રકાશ પર્વની ઘેર-ઘેર ઉજવણી થશે.
દિવાળીની પૂર્વ સંધ્યાએ ખેડા અને આણંદ જિલ્લાના તાલુકા મથકોએ ફટાકડા બજારમાં ખરીદી માટે ધૂમ ઘરાકી જામી હતી. સમી સાંજથી ઠેકઠેકાણે ટ્રાફિકજામ થતાં હજારો વાહનચાલકો અટવાયા હતા.
પ્રકાશ પર્વની ઉજવણી દરમિયાન બંને જિલ્લાનું આકાશ ફટાકડાની આતિશબાજીથી ઝળહળી ઉઠશે. પર્વ દરમિયાન દાજી જવાના કેસમાં તોતિંગ વધારાની સંભાવનાને ધ્યાને રાખી ઈમરજન્સી ૧૦૮ને ઠેકઠેકાણે સ્ટેન્ડટુ રાખવામાં આવી છે. ફટાકડા ફોડવા માટે કેટલાક પ્રતિબંધો લગાવ્યા છે પરંતુ તેનો સાચો અમલ આ વર્ષે થાય તેવું પણ દેખાતું નથી.
