હાટકેશ્વર બ્રિજ તોડવાનો 3.90 કરોડનો ખર્ચો પણ આખરે પ્રજાના માથે ઢોળાયો, તંત્રના દાવા પોકળ સાબિત

Ahmedabad News : અમદાવાદના સી.ટી.એમ.જંકશન ઉપર એક સમયે બનાવવામા આવેલ હાટકેશ્વર બ્રિજ બનાવવા અને તોડવા માટેનો એમ કુલ મળીને 38 કરોડથી વધુનો ખર્ચ અંતે મ્યુનિસિપલ કોર્પોરેશનને જ ભોગવવો પડયો છે. કોર્પોરેશનની તિજોરી ઉપર  આર્થિક ભારણ નહીં પડે.તમામ ખર્ચ અજય ઈન્ફ્રા પાસેથી જ વસૂલ કરાશે.તે પ્રકારની ગુલબાંગ ગત ટર્મમા ભાજપના સત્તાધીશો અને વહીવટી તંત્ર દ્વારા હાંકવામા આવી હતી. પરિસ્થિતિ એવી આવી પડી છે કે, બ્રિજ તોડવા માટેનો ખર્ચ અજય ઈન્ફ્રા પાસેથી મેળવવા કોર્પોરેશન હાલ કોર્ટમા જે કાર્યવાહી ચાલી રહી છે તેમા દાવો રજૂ કરશે એમ સત્તાવારસૂત્રોમાંથી જાણવા મળ્યુ છે.

મ્યુનિસિપલ કોર્પોરેશન દ્વારા રોડથી લઈ પથ્થર પેવિંગ સુધીની કામગીરી વિવિધ કોન્ટ્રાકટરો પાસેથી કરાવવા માટે ટેન્ડર પ્રક્રીયા કરવામા આવે છે. આ ટેન્ડરોમાં ઘણાં ટેન્ડરો અંદાજ કરતા ઓછા ભાવથી આપવામા આવે ત્યારે તે કામની ગુણવત્તાને લઈને સવાલ ઉપસ્થિત કરવામા આવતા હોય છે. પરંતુ આઘાતજનક બાબત તો એ છે કે, ભ્રષ્ટાચારના પર્યાય સમાન જે હાટકેશ્વર બ્રિજ કોર્પોરેશન દ્વારા શ્રી ગણેશ કોર્પોરેશન પાસે રુપિયા 3.90 કરોડના ખર્ચે તોડાવી પાડયો એ હાટકેશ્વર બ્રિજ બનાવવા વર્ષ 2015માં 10 એપ્રિલના રોજ અજય ઈન્ફ્રાને વર્કઓર્ડર આપવામા આવ્યો તે સમયે અંદાજથી ઓછા એટલે કે 9.17 ટકા ઓછા ભાવથી વર્કઓર્ડર આપવામા આવ્યો હતો.

રોડ કે અન્ય કામ અંદાજથી ઓછા ભાવથી આપવામા આવે તો એમા કયાંક ફરી સમારકામ થશે એમ માની શકાય.પરંતુ બ્રિજ જેવી કામગીરી એ સમયના તંત્રના અધિકારીઓ અને શાસકોએ કેવી રીતે આપી હશે એ બાબત ચર્ચાનો વિષય બની છે.હાલ તો બ્રિજ બનાવવા અને તોડવાનો ખર્ચ કોર્પોરેશને ભોગવવો પડયો છે.

અંદાજથી ઓછા ભાવથી અપાયેલ ફલાય ઓવર બ્રિજ કયા?

નામ            ટેન્ડર અંદાજ (કરોડ)   ખર્ચ(કરોડ)     કેટલા ટકા વધ-ઘટ     કોન્ટ્રાકટર

હાટકેશ્વર        44.02                  34.50                  9.17(-)             અજય એન્જી ઈન્ફ્રા

દિનેશ ચેમ્બર   45.41                 41.34                 11.42(-)               અજય એન્જી ઈન્ફ્રા

બ્રિજની કામગીરી આપવાના નિર્ણય કર્તા કોણ હતા?

-સ્ટેન્ડિંગ કમિટી ચેરમેન-પ્રવિણ પટેલ

-મ્યુનિસિપલ કમિશનર-ડી.થારા