ધ્રોલ પોલીસની ટીમે સોલાર પ્લાન્ટમાંથી વાયરની ચોરી કરનારા 5 આરોપીઓને ઝડપી લીધા : રૂ.4.45 લાખનો મુદ્દામાલ કબજે

Jamnagar Police : જામનગર જિલ્લાના ધ્રોલ વિસ્તારમાં સોલાર પ્લાન્ટમાંથી વીજ વાયર ચોરીના ગુનામાં ધ્રોલ પોલીસે સફળ કામગીરી કરી પાંચ આરોપીઓને ઝડપી લીધા છે, અને તેઓ પાસેથી કુલ રૂ.4,45,170 નો મુદ્દામાલ કબજે કર્યો છે.

મળતી માહિતી મુજબ, ધ્રોલ-લતીપર રોડ પર પીયાવા ચોકડી પાસે આવેલ સોલાર પ્લાન્ટમાંથી આશરે 12,000 મીટર વીજ વાયર (રૂ.2,40,000/-)ની ચોરી થયાની ફરીયાદ નોંધાઈ હતી. આ ગુનો તા.31/03/2026 થી 01/04/2026 દરમિયાન બન્યો હતો.

રાજકોટ રેન્જના નાયબ પોલીસ મહાનિરીક્ષક નિર્લિપ્ત રાય તથા જામનગર પોલીસ અધિક્ષક ડો.રવિ મોહન સૈનીના માર્ગદર્શન હેઠળ ધ્રોલ પોલીસે સી.સી.ટી.વી. ના ટેકનિકલ એનાલિસિસ તથા હ્યુમન સોર્સના આધારે તપાસ હાથ ધરી હતી. ખાનગી બાતમીના આધારે જામનગર-રાજકોટ હાઇવે પર શંકાસ્પદ બ્લૂ કલરની ટ્રાઈબર કારને રોકી તપાસ કરતાં 4 આરોપીઓને પકડી પાડવામાં આવ્યા હતા, તેમજ તપાસ દરમ્યાન ચોરીનો મુદ્દામાલ ખરીદનારને પણ ઝડપવામાં આવ્યો હતો.

ધ્રોળ પોલીસે હુસેન ઉર્ફે લેંઘો અયુબભાઈ મેપાણી, આરિફ ઇશાભાઈ તાયાણી, અસલમ ઇશાભાઈ તાયાણી, આશીફ હારુન મેપાણી, બશીરભાઈ હનીફભાઈ ચૌહાણ વગેરેને પકડી પાડ્યા છે. પોલીસે તમામ આરોપીઓ પાસેથી બ્લૂ કલરની રેનોલ્ટ ટ્રાઈબર કાર, કોપર વાયર, મોબાઇલ ફોન તથા ચોરીના સાધનો મળી કુલ રૂ.4,45,170 નો મુદ્દામાલ કબજે કર્યો છે. આ કેસમાં ધ્રોલ તથા જોડીયા પોલીસ સ્ટેશનમાં બી.એન.એસ. કલમ 303(2) મુજબ ગુનાઓ નોંધાયેલા છે. પોલીસે વધુ તપાસ હાથ ધરી છે.