બાજવા-છાણી માર્ગ 24 મીટર કરવાની માગ ઉગ્ર બની, ભારદારી વાહનોની અવર જવર પર રોક

Vadodara : વડોદરા શહેરના બાજવા-છાણી માર્ગની પહોળાઈ વધારી 24 મીટર કરવાની માગને લઈ ગઈકાલ રાતથી ગ્રામજનોએ ચક્કાજામ કરતા સ્થળ પર પોલીસ બંદોબસ્ત ગોઠવાઈ ગયો છે. અને ગ્રામજનોના આક્રોશને જોતા ભારદારી વાહનોની અવરજવર ઉપર રોક લગાવી છે.

બાજવા-છાણીનો રસ્તો સારો બનાવવા વર્ષોથી ગ્રામજનો રજૂઆત કરી રહ્યા છે. થોડા દિવસો અગાઉ મ્યુ.કોર્પોરેશન દ્વારા આ રસ્તો બનાવવાની કામગીરી હાથ ધરાતા ગ્રામજનોએ હોબાળો મચાવી કામગીરી અટકાવી હતી. અને તેઓએ જણાવ્યું હતું કે, છેલ્લા 40 વર્ષથી આ રસ્તો બનાવવા માટે રજૂઆત કરી રહ્યા છે. મુખ્યમંત્રીએ રેલ્વે ગરનાળાથી ગધેડા ગેટ સુધીનો પોણા બે કિલોમીટરનો રસ્તો 24 મીટરનો મંજૂર કર્યો હોવાની જાહેરાત કરી હતી. કોર્પોરેશન દ્વારા માત્ર 6 મીટરનો રસ્તો બનાવવાની કામગીરી હાથ ધરાતા ભ્રષ્ટાચાર જણાતા છાણી અને બાજવાના રહીશોએ કામગીરી અટકાવી હતી. દરમિયાન ગઈકાલે રાત્રે રસ્તાની માંગને લઈ ફરી ગ્રામજનો વિફરતા ચક્કાજામ કર્યો હતો. ગ્રામજનોનું કહેવું હતું કે, 24 મીટરના રસ્તાની કામગીરી ગોકળગતીએ ચાલી રહી છે. માર્ગ સાંકડો હોય ડમ્પર માતેલા સાંઢની માફક દોડી રહ્યા હોઈ અકસ્માતનું જોખમ છે. આ માર્ગ ઉપર શાળાઓ આવેલી છે. સાંસદ અને ધારાસભ્યને રજૂઆત કરવા છતાં સમસ્યાનો ઉકેલ આવી રહ્યો નથી. ડમ્પરોમાંથી જીપ્સમ ઢોળાતા લોકોને શ્વાસ લેવામાં તકલીફ પડે છે. ખાસ કરીને બાળકો અને સિનિયર સિટીઝનો બીમારીનો ભોગ બની રહ્યા છે. રસ્તો બનાવવામાં નહીં આવે તો આ પ્રકારે લડત ચાલુ રહેશે અને આગામી દિવસોમાં સાંસદ અને ધારાસભ્યની ઓફિસે હલ્લાબોલ કરી ધરણાનો કાર્યક્રમ યોજીશું.