તેરા તુજ કો અર્પણ પ્રોજેક્ટ હેઠળ ઝોન-1ના સાત પોલીસ સ્ટેશન દ્વારા 38 લાખના 282 મોબાઇલ ફોન મુળ માલિકને પરત કરાયા

અમદાવાદ, સોમવાર

અમદાવાદ શહેરમાં ચોરી કે ગુમ થતા મોબાઇલ ફોનને તેને આઇએમઇઆઇ નંબરથી ટ્રેક કરીને CEIR Portal ની મદદથી શોધવામાં આવે છે અને  તે મોબાઇલ ફોન તેમના મુળ માલિકને પરત કરવામાં આવે છે.

અમદાવાદના ઝોન-1ના તાબામાં આવતા સોલા, ઘાટલોડિયા, વાડજ, નવરંગપુરા, રીવરફ્રન્ટ, વાડજ અને  નારણપુરા પોલીસ સ્ટેશનમાંથી ચોરી થયેલા કે ગુમ થયેલા મોબાઇલ ફોન મુળ  માલિકોને પરત આપવા માટેનો કાર્યક્રમ તેરા તુજ કો અર્પણ પ્રોજેક્ટ  હેઠળ યોજવામાં આવ્યો હતો. જેમાં 38 લાખની કિંમતના 282 મોબાઇલ ફોન તેમના મુળ માલિકને પરત કરવામાં આવ્યા હતા.

આ કાર્યક્રમ સેક્ટર-1 એડીશન પોલીસકમિશનર નીરજ બડગુજર  અને ઇન્ચાર્જ ડીસીપી ઝોન-1 સફીનના માર્ગદર્શન હેઠળ યોજાયો હતો. જેમાં તમામ પોલીસ સ્ટેશનના પોલીસ ઇન્સ્પેક્ટર સહિતના અધિકારીઓ હાજર રહ્યા હતા.