સાયબર ફ્રોડના રૂા.34 લાખની હેરફેર, ચાર ઈસમો સામે ફરિયાદ

જામનગર અને મોરબીમાં 'ઓપરેશન મ્યુલ હન્ટ' યથાવત

જામનગરમાં સાયબર ક્રાઈમની ફરિયાદનો આંકડો 24 સુધી પહોંચ્યો, મ્યુલ બેંક એકાઉન્ટધારકો સામે આકરા પગલાં

સરકાર પક્ષે સીટી.એ. ડિવિઝનના પોલીસ હેડ કોન્સ્ટેબલ વિપુલભાઇ સોનગરાની ફરિયાદના આધારે જામનગરમાં દિગ્વિજય પ્લોટમાં રહેતા વિમલ રાજેશભાઇ મહેતા તેમજ પુનિતભાઇ રાઠોડ સામે ગુનો દાખલ કરવામાં આવ્યો છે. જેઓ બંને દ્વારા બેંક ખાતુ ખોલાવીને કુલ ૯,૯૦,૦૦૦ ની રકમ, કે જેનું અન ઓથોરાઇઝ ટ્રાન્જેક્શન કર્યું હોવાનું પોલીસ ફરિયાદમાં જાહેર થયું છે.

જામનગર જિલ્લામાં અત્યાર સુધીમાં કુલ ૫૭ આરોપીઓ સામે ૨૫ ફરિયાદ દાખલ કરી લેવાય છે, અને સમગ્ર પ્રકરણમાં પોલીસ દ્વારા ઊંડાણપૂર્વકની તપાસ હાથ ધરીને કુલ ૨૪ આરોપીઓને ઝડપી લેવાયા છે, અને અઢી કરોડથી વધુંનું ગેરકાયદે ટ્રાન્ઝેક્શન સામે આવ્યું છે.

મોરબી સાયબર ક્રાઇમ પોલીસમાં ફરજ બજાવતા મનોજભાઇ ઠાકશીભાઇ લક્મેં આરોપીઓ સંજય ખેંગારભાઇ સોલંકી અને મનોજ મોહનભાઇ ચૌહાણ (રહે. બંને રોહીદાસપરા મોરબી) વિરુદ્ધ ફરિયાદ નોંધાવી છે કે આરોપી મનોજ ચૌહાણે અન્ય ઇસમો સાથે મળી સાયબર ફ્રોડ કે છેતરપીંડીથી મેળવેલ નાણા સગેવગે કરવા આરોપી સંજય સોલંકીના સેવિંગ એકાઉન્ટ ખોલાવી રૂા.૨૪,૦૯,૧૫૦ જમા કરાવી કમીશન પેટે રૂા.૧૦,૦૦૦ આપી ખાતામાં જમા કરેલી રકમ ચેક, એટીએમથી વિડ્રો કરી સગેવગે કર્યાની ફરિયાદ નોંધાવી છે સાયબર ક્રાઇમ પોલીસે ફરિયાદ નોંધી તપાસ ચલાવી છે.