રખડતા પશુઓ પકડતી ઢોરપાર્ટી સાથે ગોપાલકોની દાદાગીરી

અત્રેના ઉડેરા વિસ્તારમાં પશુઓ પકડતી મ્યુનિ. કોર્પોરેશનની ઢોર ડબ્બાની ટીમ સાથે માથાભારે ત્રણ શખ્સોએ ઝઘડો કરી ગાય છોડાવી જવાનો પ્રયાસ કર્યો હતો.

ફરિયાદ મુજબ,આજે સવારે ૭ઃ૩૦ના સુમારે ઉડેરા વિસ્તારમાં આવેલી પુષ્પક સોસાયટી પાસે મ્યુનિ. કોર્પોરેશનની ઢોર ડબ્બા વિભાગની ટીમ રખડતા પશુઓ પકડવાની કામગીરી કરી રહી હતી. ટીમ દ્વારા એક ગાયને પકડી દોરડું બાંધવામાં આવી રહ્યું હતું ત્યારે કનુભાઈ રાજુભાઈ રબારી (રહે. અમરધામ સોસાયટી, કરોડિયા) ત્યાં ધસી આવ્યો હતો અને સુપ૨વાઈઝર ભાનુપ્રતાપસિંગ સાથે ‘ગાય અમારી છે, તેને છોડી દો’ કહીને ઝપાઝપી કરી હતી.

કનુ રબારીએ સુપરવાઈઝરની ફેટ પકડી ઝઘડો કરી અક્ષય અને રાહુલ નામના બે શખ્સોને બોલાવ્યા હતા. અક્ષયે ધક્કામુક્કી કરી હતી, જ્યારે રાહુલે હાથમાં બ્લોક લઈને હુમલો કરવાનો પ્રયાસ કર્યો હતો. ત્રિપુટીએ મ્યુનિ.કર્મચારીઓને ગાળો આપી ગાય છોડાવવાનો પ્રયાસ કરી કાયદેસરની કામગીરીમાં રૂકાવટ ઊભી કરી હતી.

આ મામલે જવાહરનગર પોલીસે ત્રણેય આરોપીઓ સામે ગુનો નોંધ્યો છે. નિરંકુશ ગોપાલકો સામે સખત પગલાં જરૂરી હોવાની લોકમાગ છે.