દારૂના ગુનામાં વોન્ટેડ સપ્લાયરની આગોતરા જામીન અરજી અદાલતે ફગાવી

Vadodara Court : વડોદરાના અકોટા પોલીસ મથકે નોંધાયેલા પ્રોહિબિશનના કેસમાં કોર્ટે અરજદાર રાજેશ બ્રહ્મપ્રસાદ યાદવ (રહે. તુલસીભાઈની ચાલ, સલાટવાડા) ની આગોતરા જામીન અરજી નામંજૂર કરી છે 

આરોપી રાહુલ રાજુભાઈ જોશી અને હેમંત જયંતીભાઈ પટેલે રાજેશ યાદવ પાસેથી દારૂનો મોટો જથ્થો મેળવી મકાનમાં સંગ્રહ કર્યો હતો. પોલીસ તપાસ દરમિયાન દારૂની 84 પેટીઓમાંથી 1548 બોટલો અંદાજિત કિંમત રૂ.13,17,600 નો જથ્થો ઝડપાયો હતો.

સરકારી વકીલે કોર્ટમાં રજૂઆત કરી હતી કે ફરિયાદમાં શરૂઆતથી જ અરજદારનું નામ સામેલ છે અને દારૂનો જથ્થો તેના પાસેથી મેળવ્યો હોવાનું સામે આવ્યું છે.

તપાસ દરમિયાન રાહુલ અને રાજેશ વચ્ચે દારૂના ધંધા સંબંધિત વ્યવહારો અને વાતચીતના પુરાવા મળ્યા છે. ઉપરાંત રાજેશની પત્ની અનિતાના બેંક ખાતામાં પણ આ વ્યવહારો થયા છે. 

કોર્ટે નોંધ્યું હતું કે, કેસમાં કસ્ટોડિયલ ઇન્ટ્રોગેશન જરૂરી બની શકે છે, દારૂનો જથ્થો ક્યાંથી મંગાવવામાં આવ્યો અને કોને વેચવાનો હતો તે અંગે તપાસ બાકી છે, અન્ય સંડોવાયેલા આરોપીઓ વિશે પણ તપાસ કરવાની જરૂર છે, ગુનો 11 ફેબ્રુઆરીએ નોંધાયા બાદથી અરજદાર ફરાર છે, આરોપ ગંભીર છે અને 10 વર્ષ સુધીની સજાને પાત્ર છે. આ તમામ મુદ્દાઓને ધ્યાનમાં રાખીને કોર્ટ દ્વારા રાજેશ યાદવની આગોતરા જામીન અરજી નામંજૂર કરવામાં આવી છે.