પિયર જતી રહેલી પત્નીને ધમકી આપતા પતિ સામે ફરિયાદ

વડોદરા,પિયર જતી રહેલી પત્નીને ધમકી આપતા પતિ સામે બાપોદ પોલીસે ગુનો દાખલ કરી કાર્યવાહી  હાથ ધરી છે.

આજવા નિમેટા રોડ પર ઉનડદિપ સોસાયટીમાં રહેતી સપના ઉર્ફે સકીના સલમાનભાઇ પઠાણે બાપોદ પોલીસ સ્ટેશનમાં ફરિયાદ નોંધાવી જણાવ્યું છે કે, બે વર્ષ પહેલા મેં સલમાન સલીમખાન પઠાણ (રહે. એકતાનગર પોલીસ ચોકીની સામે, આજવારોડ) સાથે કોર્ટ મેરેજ કર્યા હતા. મારા પતિ રિક્ષા ચલાવે છે. ગત ૧૪ મી તારીખે સાંજે ૭ વાગ્યે મેં મારા પતિને કોલ કરતા તેણે  રિસિવ કર્યો નહતો.રાત્રે તેઓ ઘરે આવતા મેં તેઓને પૂછતા તેમણે મને એવો જવાબ આપ્યો કે, મારી માતા પણ મને સવાલ કરતી નથી, તું કેમ મને સવાલ કરે છે ? તેઓએ મને માર મારતા હું મારી માતાના ઘરે  જતી રહી હતી. ત્યારબાદ મારા  પતિ અવારનવાર મારા માતા રાધાબેનને કહેતા કે, તમારી છોકરીને મારા ઘરે મૂકી જજો, નહીંતર ક્યાંય રસ્તામાં મળશે તો હું તેને મારી નાખીશ. ત્યારબાદ ગત ૨૫ મી તારીખે  મારા પતિ રસ્તામાં મળી જતા તેમણે મને ધમકી આપી હતી કે,ઘરે આવી જા, નહીંતર મજા નહીં આવે.