Jamnagar Crime : જામનગરમાં મોરકંડા રોડ પર સેટેલાઈટ સોસાયટી શેરી નંબર-2 માં રહેતા અને શાકભાજીનો વેપાર કરતાં તોફિક મોહમ્મદભાઈ રાજકોટીયા નામના 28 વર્ષના વેપારી યુવાને પોતાના માથા ઉપર હથોડો ફટકારી ગંભીર ઇજા પહોંચાડવા અંગે શાકભાજીના અન્ય ચાર વેપારીઓ ફારૂક ઉર્ફે રાજુભાઈ સુડીવાળા, રિયાઝભાઈ સુડીવાળા, મુસ્તાકભાઈ સુડીવાળા અને અબુભાઇ સુડીવાળા સામે ફરિયાદ નોંધાવી છે.
પોલીસ ફરિયાદમાં જાહેર કરાયા અનુસાર ફરિયાદી યુવાન કે જેણે આરોપીઓ પાસેથી શાકભાજીની ખરીદી કરી હતી, અને તેના 25,000 આપવાના હતા, જે રકમ આપી દીધી હોવા છતાં આરોપીઓ દ્વારા ધરાર બીજી વખત પૈસાની માંગણી કરવામાં આવી હતી, અને ના પાડતા ઉશ્કેરાઈ જઈ આ હુમલો કરી દીધો હતો.
જેમાં માથામાં હથોડો ઝીકયો હોવાથી જી.જી. હોસ્પિટલમાં સારવાર લેવી પડી છે, અને માથામાં છ ટાંકા આવ્યા છે. હાલ ચારેય આરોપીઓ ભાગી છૂટ્યા હોવાથી પોલીસ તેઓને શોધી રહી છે.
