જામનગરમાં ગઈકાલે સાંજે શરૂ સેકશન રોડ પર બેકાબૂ કાર ડિવાઈડર સાથે અથડાઈ : વૃક્ષ પણ પડ્યું

Jamnagar : જામનગર શહેરના શરૂ સેકશન રોડ પર શિવમ હોટલ નજીક ગઈકાલે સાંજના સમયે એક કારને અકસ્માત નડ્યો હતો. અને પુરપાટ ઝડપે આવેલી એક કાર ડિવાઈડર પર ચડી ગઈ હતી, તેમજ એક ઝાડ પણ જમીન દોસ્ત થયું હતું. મળતી માહિતી મુજબ, જી.જે.10 ડી.જે. 6381 નંબરની એક કારના ચાલકે અચાનક સ્ટીયરિંગ પરનો કાબૂ ગુમાવતા વાહન ડિવાઈડર પર ચડી ગયું હતું.

આ અકસ્માતમાં ડિવાઈડર વચ્ચે વાવેલું નાનું વૃક્ષ જમીન પર પડી ગયું હતું તેમજ ડિવાઈડરને પણ નુકસાન પહોંચ્યું હતું, જેના કારણે સરકારી સંપત્તિને નુકસાન થયું હોવાનું સામે આવ્યું છે. ઘટનામાં કાર ચાલકને સામાન્ય ઈજાઓ પહોંચી હતી. સદનસીબે કોઈ મોટી જાનહાની થઈ નહોતી. અકસ્માતના કારણે થોડા સમય માટે ટ્રાફિક વ્યવસ્થામાં વિક્ષેપ પણ સર્જાયો હતો. અને ટ્રાફિક જામના દ્રશ્ય સર્જાયા હતા. પોલીસ તંત્ર દોડતું થયું હતું અને વાહન વ્યવહાર પૂર્વવત બનાવ્યો છે, જયારે મહાનગરપાલિકાની ટીમ પણ દોડતી થઈ છે, અને નુકસાની વસૂલવા માટેની કાર્યવાહી હાથ ધરી છે.