કલેક્ટર તંત્રની નોટિસોનો ઉલાળિયો કરતા દબાણકારો પર તવાઈ : મવડીમાં કાચા-પાકા મકાન-દૂકાન-ઝુંપડાં, રૈયા ગામમાં ઢોરવાડો અને ડોગ હોસ્ટેલ, રૈયાધારમાં ખજૂરના કારખાનાનો કડૂસલો
રાજકોટ, : રાજકોટમાં કલેક્ટર તંત્રની નોટિસોનો ઉલાળિયો કરતા દબાણકારોની પેશકદમી પર અંતે આજે બુલડોઝર ફર્યું હતું અને રૂા. 30 કરોડની 3800 ચોરસ મીટર સરકારી જમીન ખુલ્લી કરાવાઈ હતી. જેમાં મવડીમાં કાચા-પાકા મકાન-દૂકાન-ઝુંપડાં, રૈયા ગામમાં ઢોરવાડો અને ડોગ હોસ્ટેલ, રૈયાધારમાં ખજૂરના કારખાનાનો કડૂસલો બોલાવી દેવામાં આવ્યો હતો.
રાજકોટ શહેરમાં મવડીના સરકારી ખરાબામાં ભલાભાઈ અમરાભાઇ દ્વારા અંદાજે 600 ચો.મી.માં પાકું દબાણ તથા અન્ય કાચા ઝૂંપડાનું 800 ચો.મી. મળી કુલ જમીન 1400 ચો.મી.નું દબાણ હટાવી લેવા અગાઉથી નોટિસ આપી હતી. પરંતુ સ્વૈચ્છિક રીતે દબાણ દૂર ન કરતા આજે કલેકટરની સૂચનાથી પ્રાંત અધિકારી અને દક્ષિણ મામલતદારની ટીમ દ્વારા પોલીસ બંદોબસ્ત, પીજીવીસીએલ, મહાપાલિકાના જેસીબી તથા મશીનરીની મદદથી 1400 ચો.મી. જમીનમાં દબાણ દૂર કરી જમીનનો કબજો સંભાળ્યો હતો. આ જમીનની પ્રતિ ચો.મી. રૂા.60,000 મુજબ અંદાજે રૂા. 8.40 કરોડ કિંમત છે.
આ સાથે આજે રૈયા ગામ પાસે માલધારી દ્વારા ઢોર બાંધવા માટેના ઢાળીયા બનાવેલા હતા, જે 400 ચોરસ મીટર સરકારી જમીન પરનું દબાણ ખુલ્લું કરાવ્યું હતું. જ્યારે રૈયા સ્મશાન પાછળ સરકારની માલિકીની 1200 ચોરસ મીટર જમીન પર ગેરકાયદે કબજો કરીને ડોગ હોસ્ટેલ ચલાવાતી હતી, તે દબાણ પણ ખુલ્લું કરાવ્યું હતું. જે તમામ 2000 ચોરસ મીટર જમીનની બજાર કિંમત અંદાજિત 20 કરોડ રૂપિયા જેટલી થવા જાય છે. આ ઉપરાંત શીતલ પાર્ક ચોકડીથી રૈયા ધાર તરફ જતા શાસ્ત્રીનગર વિસ્તારમાં આશરે 400 ચોરસ મીટર જમીન પર કબજો કરી ખજૂરનું કારખાનું બનાવ્યું હતું, જે પણ આજે દૂર કરવામાં આવ્યું હતું. જેની કિંમત રૂા. 1.60 કરોડ હોવાનો અંદાજ છે.
