સગા ભાઈએ ઉશ્કેરાટમાં બહેનને છરીના ઘા ઝીંકી મોતને ઘાટ ઉતારી

બગસરા તાલુકાના સાપર ગામનો ચકચારી બનાવ

મામા-ફઈના પિતરાઈ ભાઈ-બહેન પ્રમાંધ બનીને ભાગી જતાં બન્નેના પરિવાર વચ્ચે થયેલા મનદુઃખનો કરૂણ અંજામ

પ્રાપ્ત માહિતી અનુસાર, બગસરા તાલુકાના સાપર ગામમાં રહેતા ગીતાબેન ચૌહાણ (ઉ.વ.૫૦)ની આજે તેમના જ મકાનમાં ઘાતકી હત્યા કરવામાં આવી હતી. આ હત્યાનો આરોપ તેમના સગા ભાઈ નરેશભાઈ ખીમજીભાઈ ચૌહાણ પર મૂકવામાં આવ્યો હતો. પોલીસની પ્રાથમિક તપાસમાં બહાર આવ્યું કે, મૃતક ગીતાબેનના દીકરા અને આરોપી એવા સગાભાઈ નરેશભાઈની દીકરી એટલે કે મામા-ફઈના પિતરાઈ ભાઈ-બહેન વચ્ચે પ્રેમસંબંધ હતો.

આ વાતની જાણ થતાં જ બન્ને પરિવારો વચ્ચે મનદુઃખ ચાલતું હતું. આ દરમિયાન યુવક-યુવતી બંને ઘરેથી ભાગી ગયા હતા. જેથી ખબર પડતા દીકરીના પિતા નરેશભાઈ ભારે ગુસ્સામાં આવી ગયા હતા. આ જ ક્રોધમાં તેમણે પોતાની સગી બહેન ગીતાબેન પર છરી વડે હુમલો કરી ગંભીર ઈજાઓ પહોંચાડી હતી, જેના કારણે તેમનું ઘટનાસ્થળે જ મોત નીપજ્યું હતું. આ સનસનાટીભર્યા હત્યાના બનાવને પગલે સમગ્ર વિસ્તારમાં ચકચાર મચી ગઈ છે. 

ભારે અરેરાટીજનક ઘટનાની જાણ થતાં જ બગસરા મામલતદાર અને પોલીસનો કાફલો તાત્કાલિક સ્થળ પર દોડી આવ્યો હતો. બગસરા પોલીસ સ્ટેશનમાં ફરિયાદ નોંધાવવા તજવીજ હાથ ધરી હતી. એ.એસ.પી.ના માર્ગદર્શન હેઠળ પોલીસે આરોપી નરેશભાઈને પકડી પાડવા માટે જુદી-જુદી ટીમો બનાવીને સઘન શોધખોળ શરૂ કરી કાયદેસરની કાર્યવાહી હાથ ધરી હતી.