વડોદરાઃ વડોદરા જિલ્લામાં પાદરા એપીએમસી અને ડભોઇ એપીએમસીમાં બળવાખોરોએ નાકે દમ લાવી બેઠકો મેળવી હોવાના બનાવ બાદ સહકારી ક્ષેત્રે આબરૃ બચાવવા જિલ્લા ભાજપના આગેવાનોએ ફૂંકીફૂંકીને પગલાં ભરવા માંડયા છે.જેમાં વડોદરા જિલ્લા ખરીદ વેચાણ સંઘની ચૂંટણીમાં જૂની તારીખ નાંખી છેલ્લી ઘડીએ મેન્ડેટ અપાતાં ચર્ચાનો વિષય બન્યો છે.
વડોદરા અને છોટાઉદેપુરમાં ૬૫૦ જેટલી વિવિધ કાર્યકારી મંડળીઓ સાથે વહીવટ કરતા વડોદરા જિલ્લા સહકારી ખરીદવેચાણ સંઘની આગામી તા.૨૮મીએ ચૂંટણી યોજાઇ છે.જેના ફોર્મ ખેંચવાની આજે મુદત હોવાથી પાંચ ફોર્મ પરત ખેંચાતા કુલ ૧૨ બેઠક બિનહરીફ થઇ છે.જ્યારે,કરજણ,વાઘોડિયા અને પાદરામાં ત્રણ બેઠક ફોર્મ નહિ ખેંચાતા ચૂંટણી થશે.
સહકારી ક્ષેત્રે મેન્ડેટ આપવાની પ્રથા અમલમાં મુક્યા બાદ ભાજપને અનેકવાર પછડાટ ખાવી પડી છે.જેમાં તાજેતરમાં પાદરા એપીએમસીમાં ભાજપે સત્તા ગુમાવી હતી.તો ડભોઇ એપીએમસીમાં ૧૦માંથી ૪ બેઠક ગુમાવી હતી.
પરિણામે વડોદરા જિલ્લા સંઘની ચૂંટણીમાં પ્રભુત્વ સાબિત કરવા માટે જિલ્લા ભાજપના પ્રમુખે બે દિવસ પહેલાં ફોર્મ ચકાસણી વખતે છેલ્લી ઘડીએ મેન્ડેટ આપ્યો હતો.આ મેન્ડેટમાં જેમણે પક્ષને પૂછ્યા વગર ફોર્મ ભર્યા હતા અને બિનહરીફ જાહેર થયા છે તેમના નામનો પણ સમાવેશ કરી દેવામાં આવ્યો હતો.વળી મેન્ડેટમાં જૂની તારીખ લખવામાં આવી હોવાથી કાર્યકરો અચરજ પામ્યા છે.
કોના કોના નામે મેન્ટેડ આપ્યો
ઉમેદવાર બેઠક
પાર્થિવ એસ.પટેલ વડોદરા શહેર
યોગેશ સી.પટેલ વડોદરા તાલુકો
નટવરસિંહ સોલંકી સાવલી
જયેશ જે.પટેલ ડેસર
પિનાકીન પટેલ પાદરા
હરિકૃષ્ણ પટેલ વાઘોડિયા
ઉમેશ આર પટેલ ડભોઇ-૧
દિનેશ આર પટેલ ડભોઇ-૨
ચંદ્રવદન એમ પટેલ શિનોર
ધર્મેન્દ્ર સી.પટેલ કરજણ-૧
ધુ્રવલ એસ પટેલ કરજણ-૨
ભાવેશ ડી પટેલ સંખેડા
કૌશિક એમ પટેલ જેતપુરપાવી
અતુલ સી પટેલ ક્વાંટ
લક્ષ્મણસિંહ સોલંકી નસવાડી
ત્રણ બેઠક પર ભાજપને બળવાખોરો નડશે
વડોદરા જિલ્લા સહકાર સંઘની ત્રણ બેઠકો પર સહમતી નહિ થતાં ચૂંટણી થશે. જેમાં બે બેઠક પર તો ભાજપના જ બળવાખોર ચૂંટણી લડી રહ્યા છે.જેમાં પાદરામાં ચંદ્રેશ પટેલ સામે પક્ષના પિનાકીન પટેલ અને કરજણમાં ધર્મેશ પટેલની સામે વિશાલ પટેલે ઉમેદવારી કરી છે.વાઘોડિયામાં કોંગ્રેસના મહેન્દ્રસિંહ પરમાર સામે ભાજપના હરિકૃષ્ણ પટેલ ઉમેદવાર છે.
