અમદાવાદ: બાપુનગરમાં 8 શખસોએ ઓફિસમાં ઘૂસી યુવકને અધમૂઓ કર્યો, ફરિયાદી પોતે નીકળ્યો વોન્ટેડ!

Bapunagar Office Attack CCTV: શહેરના બાપુનગર વિસ્તારમાં કાયદો અને વ્યવસ્થાના લીરેલીરા ઉડાડતો એક કિસ્સો પ્રકાશમાં આવ્યો છે. જૂની અદાવતનો ખાર રાખીને 8 જેટલા અસામાજિક તત્વોએ એક ઓફિસમાં ઘૂસીને યુવક પર લાકડીઓ અને ઘાતક હથિયારો વડે હિંસક હુમલો કર્યો હતો. આ સમગ્ર ઘટના ઓફિસમાં લાગેલા સીસીટીવી (CCTV) કેમેરામાં કેદ થઈ ગઈ છે.

જૂની અદાવત બની હુમલાનું કારણ

મળતી માહિતી મુજબ, ફરિયાદી મલખાન સિંહ ચૌહાણની ઓફિસ પર રાહુલ મરાઠી, પ્રમોદ મરાઠી સહિત 8 શખ્સોએ હુમલો કર્યો હતો. તપાસમાં સામે આવ્યું છે કે, અગાઉ શહેરકોટડા વિસ્તારમાં થયેલી એક મારામારીની અદાવત રાખીને આ હુમલો કરવામાં આવ્યો હતો. સીસીટીવી ફૂટેજમાં જોઈ શકાય છે કે હુમલાખોરો કેવી રીતે બેફામ બનીને લાકડીઓ વરસાવી રહ્યા છે.

આ પણ વાંચો: સોસાયટીઓમાં પ્રવેશબંધી-મોંઘવારી છતાં ભાજપ કેમ જીત્યું? અસંતોષ ડામવા વપરાયો આ માસ્ટર પ્લાન

ફરિયાદી પોતે જ છે વોન્ટેડ!

આ કેસમાં સૌથી મોટો વળાંક ત્યારે આવ્યો જ્યારે પોલીસ તપાસમાં જાણવા મળ્યું કે, જે યુવક પર હુમલો થયો છે, તે મલખાન સિંહ ચૌહાણ પોતે પણ શહેરકોટડા પોલીસ સ્ટેશનના એક ગુનામાં વોન્ટેડ છે. બાપુનગર પોલીસના જણાવ્યા અનુસાર ફરિયાદીએ પોસ્ટ દ્વારા પોતાની ફરિયાદ મોકલી હતી. ફરિયાદી સામે થોડા દિવસ અગાઉ શહેરકોટડામાં મારામારીનો ગુનો નોંધાયો હતો. હાલમાં હુમલો કરનાર આરોપીઓ અને હુમલાનો ભોગ બનનાર ફરિયાદી બંને પોલીસ પકડથી દૂર છે.

પોલીસની કાર્યવાહી

બાપુનગર અને શહેરકોટડા પોલીસ હાલ સીસીટીવી ફૂટેજના આધારે તમામ ફરાર શખ્સોને શોધી રહી છે. પોલીસે આ મામલે ગુનો નોંધીને તપાસના ચક્રો ગતિમાન કર્યા છે. ભલે હુમલો જૂની અદાવતમાં થયો હોય, પણ ભરેલી ઓફિસમાં ઘૂસીને જે રીતે હુમલો થયો તેણે સમગ્ર વિસ્તારમાં ભયનો માહોલ પેદા કર્યો છે.