સૌરાષ્ટ્રના આઠ જિલ્લાની ગ્રા.પં.માં સરેરાશ 70 ટકા જેટલું ઉંચું મતદાન
વરસતા વરસાદ વચ્ચે પણ ગ્રામીણ મતદારો મત આપવા ઉમટયા
સૌથી વધુ મોરબી જિલ્લામાં સરેરાશ ૭૫ ટકા જ્યારે સૌથી ઓછું પોરબંદર જિલ્લામાં સરેરાશ ૬૧ ટકા મતદાનઃ એકંદરે શાંતિપૂર્ણ રીતે ચૂંટણી સંપન્ન
રાજકોટ જિલ્લાની ૪૫ ગ્રામ પંચાયતોની ચૂંટણીમાં સરપંચ પદ માટે સરેરાશ ૬૯.૩૮ તથા સભ્ય પદ માટે ૬૯.૩૮ ટકા મતદાન થયું હતું. જ્યારે જામનગર જિલ્લાની ૧૮૭ ગ્રામ પંચાયતોની ચૂંટણીમાં સરપંચ પદ માટે ૭૩.૧૭ ટકા જ્યારે સભ્ય પદ માટે ૭૫.૧૬ ટકા સરેરાશ મતદાન નોંધાયું હતું. મોરબી જિલ્લાની ૨૭ ગ્રા.પં.ની ચૂંટણીમાં સરપંચપદ માટે ૭૩.૭૭ ટકા જ્યારે સભ્યપદ માટે ૭૭.૧૪ ટકા મતદાન થયું હતું.
જૂનાગઢ જિલ્લાની ૭૩ ગ્રામ પંચાયતોમાં સરપંચપદ માટે સરેરાશ ૭૦.૭૦ ટકા જ્યારે સભ્ય પદ માટે ૭૧.૭૧ ટકા મતદાન થયું હતું. ગીર સોમનાથ જિલ્લાની ૨૨ ગ્રામ પંચાયતોમાં સરપંચ પદ માટે ૭૩.૧૦ ટકા જ્યારે સભ્ય પદ માટે ૭૩.૩૦ ટકા મતદાન નોંધાયું છે. પોરબંદર જિલ્લાની ૧૫ ગ્રામ પંચાયતોમાં સરપંચ પદ માટે ૬૦.૬૫ ટકા જ્યારે સભ્ય પદ માટે ૬૧.૭૨ ટકા સરેરાશ મતદાન થયું છે.
અમરેલી જિલ્લાની ૮૬ ગ્રામ પંચાયતોમાં સરપંચ પદ માટે ૭૦.૮૮ ટકા જ્યારે સભ્ય પદ માટે ૭૧.૧૯ ટકા મતદાન થયું છે. જ્યારે દ્વારકાની ૬૯ ગ્રામ પંચાયતોમાં સરપંચ પદ માટે ૭૩.૨૫ ટકા જ્યારે સભ્ય પદ માટે ૭૨.૭૧ ટકા સરેરાશ મતદાન થયું છે.
મોરબીના ડાયમંડનગર ગામે ઉમેદવારની પોલીસ સાથે રકઝક
મોરબી: મોરબી તાલુકાના ડાયમંડનગર ગામે ચૂંટણીના મતદાન સમયે પોલીસ સાથે ઉમેદવારની રકઝકનો બનાવ સામે આવ્યો હતો. ડાયમંડનગર ગામે બૂથ પાસે વોર્ડનાં સભ્યનો ઉમેદવાર બેઠો હતો જેને બહાર જવાનું કહેતા રકઝક થવા પામી હતી. પોલીસ અને ઉમેદવાર વચ્ચે થોડીવાર રકઝક થઇ હતી. જેથી થોડીવાર માટે મામલો તંગ બન્યો હતો. જો કે અધિકારીઓએ સ્થળ પર દોડી જઇને મામલો થાળે પાડયો હતો.
