વીજ નિગમમાં ભરતી ન થતા, 3 વર્ષથી રાહ જોતા ઉમેદવારોના મુખ્ય કચેરીએ ઉગ્ર દેખાવો

Vadodara MGVCL : ગુજરાત ઊર્જા વિકાસ નિગમ લિમિટેડ (GUVNL) દ્વારા વર્ષ 2022માં એપ્રેન્ટિસની જગ્યાઓ માટે લેવાયેલી પરીક્ષામાં પાસ થયેલા યુવાનોએ નોકરી ન મળતાં આજે ફરી એકવાર વિરોધ પ્રદર્શન કર્યું હતું. રાજ્યભરના આ યુવાનોએ વડોદરા સ્થિત વીજ નિગમની વડી કચેરી, ઇલોરા પાર્ક ખાતે સૂત્રોચ્ચાર અને બેનરો સાથે ધરણા યોજ્યા હતા.

આ યુવાનોનો આક્ષેપ છે કે, 2022માં પરીક્ષા પાસ કર્યા બાદ પણ વીજ નિગમ દ્વારા જુદા જુદા બહાના બતાવીને ભરતી પ્રક્રિયા ટાળવામાં આવી રહી છે. છેલ્લા ત્રણ વર્ષથી આ યુવાનો નોકરીની રાહ જોઈ રહ્યા છે, જેના કારણે તેઓ બેરોજગાર છે અને હતાશા અનુભવી રહ્યા છે.

આ પહેલા પણ આ પાસ થયેલા એપ્રેન્ટિસોએ અનેકવાર વીજ નિગમની વડી કચેરીએ દેખાવો અને ધરણાં કરીને ઉચ્ચ અધિકારીઓને આવેદનપત્રો આપ્યા છે. તેમ છતાં કોઈ સકારાત્મક પગલાં ન લેવાતા, આજે ફરી એકવાર તેઓ 'અમને ન્યાય આપો' અને 'એપ્રેન્ટિસોની ભરતી કરો' જેવા સૂત્રોચ્ચાર સાથે મેદાને ઉતર્યા હતા.

આ યુવાનોની માંગ છે કે, વીજ નિગમ તાત્કાલિક ધોરણે પાસ થયેલા તમામ યુવાનોને નોકરી પર રાખીને તેમની સાથે થયેલો અન્યાય દૂર કરે. આ આંદોલનથી રાજ્ય સરકાર અને વીજ નિગમ પર યુવાનોને ઝડપી ન્યાય આપવાનું દબાણ વધ્યું છે.