બંધ બોડીના ટેમ્પોમાં ક્રુરતાપૂર્વક લઇ જવાતા મુંગા પશુઓને બચાવાયા

વડોદરા, તા.6 બોરસદથી વલણ ખાતે મુંગા પ્રાણીઓને ક્રુરતાપૂર્વક લઇ જવાતા બે બંધ બોડીના ટેમ્પાને ઝડપી પાડી ત્રણ શખ્સોની ધરપકડ કરવામાં આવી છે.

પ્રાપ્ત માહિતી મુજબ જીવદયા કાર્યકરોએ મળેલી માહિતી મુજબ વાસદથી સુરત તરફના દિલ્હી-મુંબઇ ભારતમાલા હાઇવે પર બે બંધ બોડીના ટેમ્પોનો પીછો કર્યો હતો અને દિલ્હી-મુંબઇ ભારતમાલા હાઇવે પર સમીયાલા-પાદરા કટ પાસે બંને ટેમ્પાને રોક્યા હતાં. બંને ટેમ્પામાં તપાસ કરતાં અંદર ખીચોખીચ ભેંસો જોવા મળી હતી.

બંધ બોડીની ગાડીમાં ક્રુરતાપૂર્વક દોરડાથી ભેંસો બાંધેલી જણાઇ હતી તેમજ તેમના માટે ઘાસચારો કે પાણીની કોઇ વ્યવસ્થા કરવામાં આવી ન હતી. બંને ટેમ્પામાંથી કુલ ૩૫ ભેંસોને બચાવીને પાંજરાપોળ ખાતે રાખવામાં આવી હતી. પોલીસે કુલ રૃા.૧૭ લાખનો મુદ્દામાલ કબજે કરી મહંમદતોસીફ ગુલામભાઇ વ્હોરા (રહે.વલણ, તા.કરજણ), એઝાજ સલીમ જાકા (રહે.બાબર કોલોની, કરજણ), રફિક ઇસ્માઇલ મલેક (રહે.આંતી, તા.પાદરા)ની ધરપકડ કરી પૂછપરછ કરતાં જાણવા મળ્યું હતું કે બોરસદમાં રહેતા સાજીદ આઝીએ તબેલામાંથી મુંગા પશુઓ ભરીને વલણ ખાતે રહેતા મિન્હાઝ યાકુબ દરવેસના તબેલામાં લઇ જવા કહ્યું હતું. આ અંગે તાલુકા પોલીસે ગુનો દાખલ કરી વધુ તપાસ હાથ ધરી છે.