મુંબઈના થાણેમાં હોવાની બાતમી મળતાં પોલીસ ત્રાટકી : 6 વર્ષ પહેલાં અનુ. જાતિ સમાજના લોકોને ગૃહ ઉદ્યોગ માટે લોનની લાલચ આપીને ડોક્યુમેન્ટ મેળવી બારોબાર રૂપિયા ઓળવી જવાના ચકચારી પ્રકરણમાં કાર્યવાહી
પોરબંદર, : પોરબંદરમાં 6 વર્ષ પહેલા 2019ની સાલમાં આંધ્ર બેન્કના મેનેજરે અનુસૂચિત જાતિ સમાજને મળવાપાત્ર લોનના 6,90,000ના નાણા અંગત ઉપયોગમાં લઈને વિશ્વાસઘાત કરતા છેતરપિંડીનો ગુનો નોંધાયો હતો અને ત્યારથી આ ઈસમ વોન્ટેડ હતો, જેને કમલાબાગ પોલીસે મુંબઈ જઈને પકડી પાડયો છે.
ઉદ્યોગનગર ઘાસ ગોડાઉનની પાછળ રહેતા રામ વેજા ચાવડા દ્વારા વર્ષ 2019માં કમલાબાગ પોલીસ મથકમાં એવા પ્રકારની પોલીસ ફરિયાદ નોંધાવવામાં આવી હતી કે તેઓ અનુસૂચિત જાતિના હોવાથી નાના ગૃહ ઉદ્યોગ માટે પોરબંદરના પેરેડાઈઝ ફુવારા પાસે આવેલી આંધ્ર બેન્કમાંથી લોન મળે છે તેવી માહિતી તેમની જ્ઞાાતિના આગેવાન ભીખુ નારણ મકવાણાએ આપી હતી. જેથી પોતાના ડોકયુમેન્ટની નકલો સાથે આશાપુરા જીઆઈડીસી રોડ પર રહેતા રાજુ સાજણ કેશવાલોને મળ્યા હતા અને તેણે એવું જણાવ્યું હતું કે બે ત્રણ મહિનામાં તમારી લોન મંજૂર થઈ જશે. પરંતુ બાદમાં અચાનક આંધ્ર બેન્ક ખાતેથી એવી નોટિસ મળી હતી કે તમારે રૂા.10,38,746 ભરવાના થાય છે. આથી તપાસ કરતાં બિલ્ડીંગ કન્સ્ટ્રકશન સેન્ટીંગ બાબતની તેના નામે લોન લેવાઈ હોવાનું જણાવતા ચોંકી ઉઠયો હતો અને બેન્કના અધિકારીને મળીને તપાસ કરતા એવું જણાવ્યું હતું કે લોન મંજૂર કરનાર બેન્ક મેનેજર વૈભવ બબન નલાવડે અને રાજુ સાજણ કેશવાલાએ લોન કેસના કાગળો રજૂ કરીને ખોટી સહી કરીને મંજૂર કરેલી રકમની ઉચાપત કરી છે અને મેનેજરને ખાતાકીય કાર્યવાહી કરીને સસ્પેન્ડ કર્યો છે. આથી તનાવમાં આવી રાજુ કેસવાલાના ઘરના વાહન પાર્કિંગમાં ફીનાઈલ પીને આપઘાતની કોશિશ કરી હતી. ત્યારબાદ પણ બેંકના અધિકારીઓએ સહકાર નહીં આપતા જૂનાગઢ રેન્જના આઈજીપીની કચેરી ખાતે ઉપવાસ પર બેસવા માટે ચેતવણી આપતા આખરે નવા મેનેજરે સહકાર આપીને લોન કેસમાં ભોગ બનેલા લોકો અંગે તપાસ કરતા કુલ 60,90,746ની છેતરપિંડી થયાનું બહાર આવ્યું હતું અને ફરિયાદીની જેમ જ અન્ય લોકોના નામે પણ લોન લેવાઈ હોવાનું જણાયું હતું.
અંતે આંધ્ર બેન્કના મેનેજર વૈભવ બબન નલાવડે અને પોરબંદરના રાજુ સાજણ કેસવાલા સામે ફરિયાદ દાખલ થઈ હતી, જેમાં એટ્રોસિટી એકટ અને છેતરપિંડી સહિતની કલમો હેઠળ ગુનો દાખલ થયો હતો ત્યારથી વૈભવ બબન વોન્ટેડ હતો. હવે છેલ્લા 6 વર્ષથી નાસતો ફરતો આરોપી વૈભવ બબન નાલાવડેલ હાલ શંખેશ્વર પ્લેટિનિયમ ટાવર થાણે મુંબઈ ખાતે હોવાની બાતમી મળતા પોરબંદર પોલીસે વોચ ગોઠવીને ઝડપી લઈ પોરબંદર લાવી વધુ કાર્યવાહી હાથ ધરી છે.
