આરટીઓ ચલણની ફાઇલ મોકલી શેરથા ગામના વૃદ્ધ સાથે 18.72 લાખની છેતરપિંડી

સાયબર ગઠિયાઓનો આતંક યથાવત

ગઠિયાએ બેંક મેનેજરના નામે ફોન કરીને વિગતો મેળવ્યા બાદ રૂપિયા સેરવી લીધા : સાયબર ક્રાઇમની તપાસ

હાલમાં સાયબર ક્રાઇમની ઘટનાઓ સતત વધી રહી છે ત્યારે મોબાઇલમાં આરટીઓ ચલણના નામે ફાઈલ મોકલીને બેંક ખાતુ ખાલી કરવામાં આવી રહ્યું છે. ગાંધીનગર નજીક આવેલા શેરથા કસ્તુરીનગરમાં રહેતા વૃદ્ધ પણ આ જ પ્રકારની છેતરપિંડીનો ભોગ બન્યા હતા. જે સંદર્ભે મળતી વિગતો પ્રમાણે વૃદ્ધ સોમાભાઈ કાનાભાઈ પ્રજાપતિના મોબાઈલ પર ગત ૧૭ નવેમ્બરના રોજ બપોરે વોટ્સએપ પર એક અજાણ્યા નંબર પરથી આરટીઓ ચલણ ભરવા માટેની એક એપીકે ફાઇલ આવી હતી. સોમાભાઈએ અજાણતા આ ફાઇલ ઓપન કરી હતી. ત્યારબાદ તે જ દિવસે સાંજે તેમને એક નંબર પરથી ફોન આવ્યો હતો. ફોન કરનાર વ્યક્તિએ પોતાની ઓળખ ઇન્ડિયન ઓવરસીઝ બેંકમાંથી મિશ્રા વાત કરું છું તેમ આપી હતી અને કેવાયસી અપડેટ કરવા માટે જણાવ્યું હતું. જોગાનુજોગ સોમાભાઈની બેંક શાખાના મેનેજરનું નામ પણ મિશ્રા હોવાથી તેમને વિશ્વાસ આવી ગયો હતો કે આ કોલ બેંકમાંથી જ છે. ગઠિયાઓએ વિશ્વાસમાં લઈને સોમાભાઈ પાસેથી તેમના ડેબિટ કાર્ડની વિગતો અને જન્મતારીખ જાણી લીધી હતી. આ દરમિયાન તેમના દીકરાના મોબાઈલ પર ઓટીપી આવ્યો હતો, પરંતુ દીકરાએ ઓટીપી આપવાની ના પાડી દીધી હતી. જોકે, અગાઉ આરટીઓ ચલણની લિંક ઓપન કરવાને કારણે તેમનો મોબાઈલ ફોન હેક થઈ ચૂક્યો હતો. થોડીવારમાં જ તેમના બેંકના ખાતામાંથી ટુકડે-ટુકડે કુલ ૧૮,૭૨,૪૪૫ અન્ય ખાતાઓમાં ટ્રાન્સફર થઈ ગયા હતા. આ ઉપરાંત, તેમના મોબાઈલમાંથી કોન્ટેક્ટ લિસ્ટમાં રહેલા સગા-સંબંધીઓને પણ આપમેળે પેલી આરટીઓ વાળી ફ્રોડ લિંક વોટ્સએપ પર સેન્ડ થવા લાગી હતી. પોતાની સાથે છેતરપિંડી થઈ હોવાનું જણાતા તાત્કાલિક સાયબર હેલ્પલાઇન પર જાણ કરી હતી અને ત્યારબાદ ગાંધીનગર રેન્જ સાયબર ક્રાઈમ પોલીસ સ્ટેશનમાં ફરિયાદ નોંધાવી હતી.