મોબાઇલ ફોનમાં ધમકીની ઓડીયો ક્લિપ વાયરલ થતાં લાલાવદર ગામના લોકો સુરેન્દ્રનગરમાં આમ આદમી પાર્ટીની સભામાં ગયા મુદ્દે ડખ્ખો થતાં રાજકારણ ગરમાયું
અમરેલી, : અમરેલી તાલુકા ભાજપ પ્રમુખ ચેતન ધાનાણી સામે ગઇકાલે લાલાવદર ગામના દલિતને અપમાનિત કરી ગાળો આપી હોવાની પોલીસ ફરિયાદ બાદ આજે તેઓએ તાલુકા પ્રમુખ પદેથી રાજીનામું મોકલી દીધું હોવાનું બહાર આવ્યું હતું.
આજરોજ અમરેલીના તાલુકા ભાજપ પ્રમુખે જિલ્લાના ભાજપના હોદેદારોને પોતાનું રાજીનામું મોકલી આપતા પત્રમાં જણાવ્યું કે મારા નામથી કથિત ઓડીયો ક્લીપ સોશિયલ મીડિયામાં વાયરલ થઇ છે. જેના કારણે પાર્ટી ઉપર આક્ષેપો થઇ રહ્યા છે. તેથી નૈતિકતાના ધોરણે હું તાલુકા ભાજપ પ્રમુખ અમરેલીના હોદ્દા ઉપરથી સ્વેચ્છાએ રાજીનામુ આપુ છું. કાર્યકર્તા તરીકે પાર્ટીનું કામ કરતો રહીશ તેમ અંતમાં જણાવ્યું હતું.
ગઇકાલે સુરેન્દ્રનગર ખાતે આમ આદમી પાર્ટીની સભામાં લાલાવદર ગામના લોકો ગયા હતા. તે તાલુકા ભાજપ પ્રમુખને સારુ નહીં લાગતા તેઓએ મહેશભાઈ ઉર્ફે જિગાભાઈ ભાનુભાઈ માધડના મોબાઇલ ફોનમાં જેમ ફાવે તેમ ગાળો આપી જાનથી મારી નાખવાની ધમકી આપી હોવાની પોલીસમાં ફરિયાદ દાખલ થઇ હતી. સમાજના આગેવાનોના વિરોધ બાદ આજે તાલુકા ભાજપના પ્રમુખપદેથી રાજીનામુ આપવાની ઘટના બનતા અમરેલીના સ્થાનિક આગેવાનોમાં આ મુદ્દો આજે ચર્ચાસ્પદ બની રહ્યો હતો.
