અમદાવાદના જુહાપુરામાં ડમ્પર ચાલકનો કહેર, મોપેડ ચાલકને કચડી નાખતાં કમકમાટીભર્યું મોત

Ahmedabad News : અમદાવાદના સરખેજ વિસ્તારમાં આજે એક હૃદયદ્રાવક અકસ્માતની ઘટના સામે આવી છે. રોયલ અકબર ટાવર પાસે પૂરપાટ ઝડપે આવી રહેલા એક ડમ્પરે મોપેડ સવાર યુવકને જોરદાર ટક્કર મારતા તેનું ઘટનાસ્થળે જ કમકમાટીભર્યું મોત નીપજ્યું છે.લોકોનાં ટોળેટોળા ઘટના સ્થળે ઉમટી પડ્યાં છે. 

ઘટના અંગે વિગતે મળતી માહિતી મુજબ, એક યુવાન પોતાનું મોપેડ લઈને પસાર થઈ રહ્યો હતો ત્યારે કાળમુખા ડમ્પરે તેને પોતાની અડફેટે લીધો હતો. અકસ્માત એટલો ભયાનક હતો કે યુવકને ગંભીર ઈજાઓ પહોંચી હતી અને તેનું પ્રાણપંખેરું ઉડી ગયું હતું. અકસ્માત થતાની સાથે જ આસપાસના લોકોના ટોળેટોળા ઘટનાસ્થળે ઉમટી પડ્યા હતા. સ્થાનિકો દ્વારા તાત્કાલિક 108 એમ્બ્યુલન્સને જાણ કરવામાં આવી હતી, પરંતુ મેડિકલ ટીમે તપાસ બાદ યુવકને મૃત જાહેર કર્યો હતો.

પોલીસ કાર્યવાહી

ઘટનાની જાણ થતા જ સરખેજ પોલીસનો કાફલો સ્થળ પર પહોંચી ગયો હતો. પોલીસે મામલાની ગંભીરતા જોઈને યુવકના મૃતદેહને કબજે કરી પોસ્ટમોર્ટમ અર્થે હોસ્પિટલ ખસેડ્યો છે. ડમ્પર ચાલક વિરુદ્ધ અકસ્માતનો ગુનો દાખલ કરવાની તજવીજ હાથ ધરી છે. સીસીટીવી ફૂટેજ અને પ્રત્યક્ષદર્શીઓના આધારે વધુ તપાસ શરૂ કરી છે. ઉપરાંત ડમ્પર ચાલકને પકડવા માટે પણ ચક્રોગતિમાન કર્યા છે.