ડુપ્લીકેટ સોનાના દાગીના પધરાવી ઠગે અમદાવાદ રેલવેના ચીફ ટિકિટ ઇન્સ્પેક્ટરને રૂ.7 લાખનો ચૂનો ચોપડયો

Vadodara : અમદાવાદ રેલવે હેડક્વાર્ટર ખાતે ફરજ બજાવતા ચીફ ટિકિટ ઇન્સ્પેક્ટરને એક શખ્સે સોનાના દાગીના અને લગડી આપવાના બહાને ડુપ્લીકેટ દાગીના પધરાવી રૂપિયા 7 લાખ પડાવી લીધા હતા. જેથી ટીસીએ ચૂનો ચોપડનાર વિરુદ્ધ વડોદરા રેલવે પોલીસમાં ઠગાઈની ફરિયાદ નોંધાવી છે.

 અમદાવાદ હેડ ક્વાર્ટરમાં ચીફ ટિકિટ ઇન્સ્પેક્ટર તરીકે ફરજ બજાવતા રાજેશકુમાર બજરંગલાલ ખીચીએ વડોદરા રેલવે પોલીસમાં ફરીયાદ નોધાવી છે કે, હું ગઇ 30 મેના રોજ મારી નોકરી અમદાવાદથી સુર્યનગરીમાં બાન્દ્રા અને બાન્દ્રાથી સુર્યનગરી ટ્રેનમાં અમદાવાદ સુધીની હતી. દરમિયાન હું મુસાફરોની ટીકીટ ચેક કરતો અમદાવાદ જતો હતો ત્યારે વિશ્વામિત્રી અને વડોદરા રેલવે સ્ટેશન વચ્ચે રાજુભાઈ નામના ઇસમે મને જણાવેલ કે હું કડીયા કામ કરૂ છું મારી છોકરીના લગ્ન માટે પૈસાની જરૂર છે મારી પાસે કડીયા કામ કરતા દરમ્યાન સોના-ચાંદીની જુની વસ્તુઓ મળેલ છે. તમે કોઇની પાસે વેચાણ કરીને મને મદદ કરો તેમ કહી મને એક લગડી આપી હતી. જેથી મેં તે ઇસમનો મોબાઈલ નંબર લીધો હતો અને મારો પણ તેને નંબર આપ્યો હતો. એક લગડી મેં સોનીને બતાવતા જે સોનાની હોવાનું જણાવ્યુ હતું. ત્યારબાદ 2 જૂનના રોજ સવારના આશરે આઠેક વાગ્યાની આસપાસ મારા મોબાઈલ ફોન પર આ ઇસમની ફોન આવેલ અને જણાવ્યું હતું કે મારી દિકરીના લગ્ન લેવાના હોય રૂ.10 લાખની જરૂર છે. જેથી મારી પાસેની સોનાની તમામ વસ્તુઓ તમને આપી દઈશ તમે મને 10 લાખ આપો. જેથી મેં તેઓને જણાવેલ કે હું તમને 7 લાખ આપી શકીશ. જેથી તેઓ રાજી થયા હતા. ટીસીએ બેંકમાંથી રૂપિયા 8.07 લાખની લોન લઈને 4 જૂને તે શખ્સને આણંદ ખાતે આણંદ ખાતે બોલાવ્યો હતો અને રૂપિયા તેના હાથમાં આપતા તેણે મને સોનાની લગડી અને દાગીના ભરેલી બે થેલી આપી હતી. ત્યારબાદ આ શખ્સ રૂપિયા લઈને નીકળી ગયો હતો. મેં ઘરે જઈને તેને ફોન કરતા તેનો ફોન સ્વીચ ઓફ આવતો હોય શંકા ગઈ હતી. જેથી મે સોનીને દાગીના અને લગડી બતાવતા તેઓએ ડુપ્લીકેટ હોવાનું જણાવ્યું હતું. આમ ઠગ મને સોનાના દાગીના અને લગડી આપવાના બહાને મારી પાસેથી રૂપિયા 7 લાખ પડાવીને મારી સાથે છેતરપિંડી આચરી છે.