અમદાવાદ: લૂંટના ઈરાદે લસ્સીમાં ઝેર ભેળવી વૃદ્ધની હત્યા કરનાર 'લતા' ઝડપાઈ

Ahmedabad Crime News: અમદાવાદ ક્રાઈમ બ્રાન્ચે એકલવાયા વૃદ્ધોને પોતાની જાળમાં ફસાવી, નશીલો પદાર્થ પીવડાવી લૂંટ ચલાવતી મહિલા લતા ઉર્ફે લકડી ચૌહાણની ધરપકડ કરી છે. દરિયાપુર વિસ્તારમાં બનેલી એક ઘટનામાં મહિલાએ પીવડાવેલી નશીલી લસ્સીના કારણે 81 વર્ષીય વૃદ્ધનું મોત નીપજતા આ મામલો હવે લૂંટ સાથે હત્યામાં પરિણમ્યો છે.

દરિયાપુરમાં લૂંટ હત્યામાં બદલાઈ

મળતી માહિતી અનુસાર, દરિયાપુરના દિલ્હી ચકલા પાસે આવેલા સજ્જન જમાદારના મહોલ્લામાં લતાએ 81 વર્ષીય અબ્દુલભાઇ સિપાઇ અને તેમના પત્નીને ઘેનની દવા ભેળવેલી લસ્સી પીવડાવી હતી. દંપતી બેભાન થતા જ તે રોકડ રકમ ચોરીને નાસી ગઈ હતી. જોકે, દવાની વધુ પડતી માત્રાને કારણે અબ્દુલભાઇની તબિયત લથડી હતી અને સારવાર દરમિયાન તેમનું કરૂણ મોત નીપજ્યું હતું.

55 વર્ષીય આરોપી મહિલા અત્યંત શાતિર રીતે ગુનાને અંજામ આપતી હતી. તે એવા વૃદ્ધ દંપતી કે વ્યક્તિઓની શોધ કરતી જેઓ એકલા રહેતા હોય. વૃદ્ધોની એકલતાનો લાભ લઈ, તેમની જમવાની વ્યવસ્થા કરી આપવાના બહાને વિશ્વાસ જીતી ઘરમાં પ્રવેશ મેળવતી હતી. ઘરમાં ઘૂસ્યા બાદ તે નશીલો પદાર્થ કે દવા ભેળવેલી ખાદ્ય સામગ્રી પીવડાવી વ્યક્તિને બેભાન કરી લૂંટ ચલાવી ફરાર થઈ જતી હતી.

આ પણ વાંચો: મહેસાણામાં ભાજપ-કોંગ્રેસના સમર્થકો વચ્ચે ખૂની ખેલ, ભાજપ ઉમેદવારના ભાણાની છરીના ઘા ઝીંકી હત્યા

પોલીસ કાર્યવાહી અને ધરપકડ

ક્રાઈમ બ્રાન્ચે હ્યુમન ઇન્ટેલિજન્સ અને ટેકનિકલ સર્વેલન્સના આધારે શાહપુર વિસ્તારમાં દરોડો પાડી આરોપી મહિલાને તેના ઘરેથી ઝડપી પાડી છે. પોલીસ તેની વિરુદ્ધ BNS કલમ 105, 123, 329(2) અને 303(2) મુજબ ગુનો નોંધવામાં આવ્યો છે. પકડાયેલ લતાબેન રીઢી ગુનેગાર છે. તેની વિરુદ્ધ અમદાવાદના વિવિધ પોલીસ સ્ટેશનોમાં અગાઉ 9 જેટલા ગુનાઓ નોંધાઈ ચૂક્યા છે.