બુલેટ ટ્રેન પ્રોજેક્ટ માટે અમદાવાદમાં 10મો સ્ટીલ બ્રિજ સફળતાપૂર્વક લોન્ચ: માત્ર 7 કલાકમાં કામગીરી પૂર્ણ

Mumbai Ahmedabad Bullet Train Project : મુંબઈ-અમદાવાદ બુલેટ ટ્રેન પ્રોજેક્ટની કામગીરીમાં વધુ એક સીમાચિહ્ન પ્રાપ્ત થયું છે. ગુજરાતના અમદાવાદમાં પ્રોજેક્ટના 10મા સ્ટીલ બ્રિજનું બાંધકામ સફળતાપૂર્વક પૂર્ણ કરી તેને લોન્ચ કરવામાં આવ્યો છે. આ 60 મીટર લાંબો સ્ટીલ બ્રિજ રેલવે ટ્રેકની નજીક સ્થિત પશ્ચિમ રેલ્વેની સુવિધા (લોન્ડ્રી) ઉપરથી પસાર થશે.

મહિનાઓનું ઝીણવટભર્યું આયોજન અને તૈયારી બાદ આ બ્રિજનું લોન્ચિંગ માત્ર 7 કલાકના અત્યંત ટૂંકા સમયગાળામાં ચોકસાઈ સાથે પૂર્ણ કરવામાં આવ્યું હતું. નોંધનીય છે કે અમદાવાદ જિલ્લામાં બુલેટ ટ્રેન પ્રોજેક્ટ માટે લોન્ચ કરાયેલો આ પહેલો સ્ટીલ બ્રિજ છે.

માત્ર 7 કલાકમાં કામગીરી પૂર્ણ

485 મેટ્રિક ટન વજન ધરાવતા આ પુલને ટ્રાન્સવર્સ લોન્ચિંગ પદ્ધતિથી સ્થાપિત કરવામાં આવ્યો. આ માટે પુલને જમીનથી 16.5 મીટરની ઊંચાઈ પર અસ્થાયી ટ્રેસલ પર એસેમ્બલ કરાયો હતો. ત્યારબાદ સ્ટેબિલિટી માટે લૉકિંગ ટ્રૉલીના સપોર્ટ સાથે, 200-ટન ક્ષમતાવાળા બે સેમી-ઓટોમેટિક જેકની મદદથી માત્ર 7 કલાકમાં તેને સાઇડ-સ્લ્યૂ (બાજુમાં ખસેડવાની) કરીને તેની અંતિમ જગ્યાએ ગોઠવવામાં આવ્યો.

12 મીટર ઊંચાઈ અને 11.4 મીટર પહોળાઈ ધરાવતો આ પુલ વર્ધા (નાગપુર, મહારાષ્ટ્ર) ખાતે વિશેષ વર્કશોપમાં ફેબ્રિકેટ કરવામાં આવ્યો હતો અને તેને ખાસ ડિઝાઇન કરેલા ટ્રેલરનો ઉપયોગ કરીને અમદાવાદ લાવવામાં આવ્યો હતો. પુલના નિર્માણમાં લગભગ 20360 ટોર-શિયર પ્રકારના હાઇ સ્ટ્રેન્થ (ટીટીએચએસ) બોલ્ટ્સનો ઉપયોગ થયો છે, તેમજ વધારે ટકાઉપણા અને વાયબ્રેશન નિયંત્રણ માટે ઇલાસ્ટોમેરિક બેરિંગ્સ મૂકવામાં આવ્યા છે.

28 સ્ટીલ પુલ બનાવવાની યોજના

મુંબઈ-અમદાવાદ બુલેટ ટ્રેન વિયાડક્ટ અમદાવાદમાં કુલ 31 ક્રોસિંગ્સમાંથી પસાર થશે, જેમાં રેલ્વે ટ્રૅક્સ, ફ્લાયઓવર્સ, નહેર, સાબરમતી નદી પર એક રિવર પુલ ક્રોસિંગ અને છ સ્ટીલ પુલ્સનો સમાવેશ થાય છે. સમગ્ર કોરિડોર માટે કુલ 28 સ્ટીલ પુલ બનાવવાની યોજના છે, જેમાંથી 17 ગુજરાતમાં અને 11 મહારાષ્ટ્રમાં છે.