કણકોટના યુવકનું અપહરણ કરી એક કરોડની ખંડણી માગી હતી, ત્રણ ઝબ્બે

અન્ય ત્રણ આરોપીઓ ભાગી જતાં શોધખોળ

એકવાર ખર્ચો આપનાર યુવક પાસે મોટી રકમ હોવાની શક્યતા પરથી તેના અપહરણની યોજના બનાવી હતી

આ કેસમાં વધુ ત્રણ આરોપીઓના નામો ખૂલતા તમામની આજી ડેમ પોલીસ અને એલસીબીની ટીમે શોધખોળ શરૂ કરી છે. આજી ડેમ પોલીસની તપાસમાં ખૂલ્યા પ્રમાણે મુકેશ અને આરોપી વિજય કુવાડવા રોડ પોલીસ મથકમાં નોંધાયેલા મારામારીના ગુનામાં જેલમાં બંધ હતા. તે વખતે તમામ ખર્ચો મુકેશે ઉપાડવાનું નક્કી થયું હતું. જે તેણે ઉપાડયો પણ હતો. જેને કારણે વિજયને એમ લાગ્યું કે મુકેશ પાસે ગમે ત્યાંથી બહુ પૈસા આવી ગયા છે. જેને કારણે તેને ઉઠાવી જઇ, ખંડણી વસૂલવાની યોજના બનાવી હતી.

જેના ભાગરૂપે તેનું અપહરણ કરી ચોટીલા પંથકની સીમમાં ગોંધી રાખ્યો હતો. ત્યાર પછી તેના મિત્ર પાસે એક કરોડની ખંડણી માગી હતી. રકઝકના અંતે રૂા. ૧૦ લાખ લેવા તૈયાર થઇ ગયા હતા. આ રકમ લેવા માટે અપહૃત મુકેશને લઇને મેટોડા પહંચ્યા હતા. જ્યાં આજી ડેમના પીએસઆઈ એ.આર. રાઠોડ, એએસઆઈ હેમદીપ મારવાણીયા સહિતની ટીમો પણ હાજર હતી. 

પોલીસને જોઇ આરોપીઓ છરી બતાવી ભાગવા લાગ્યા હતા. પોલીસે પીછો કરી નજીકમાંથી એક આરોપી અને બાદમાં અન્ય બે આરોપીઓને પણ ઝડપી લીધા હતાં. મુકેશનું આરોપીઓ તેની જ સ્વીફટ કારમાં અપહરણ કરી ગયા હતા. તે કાર પણ પોલીસે કબજે કરી છે. આરોપીઓ પાસે પણ એક સ્વીફટ કાર હતી. જે કબજે કરવા પોલીસે તજવીજ શરૂ કરી છે. આ ઉપરાંત ગુનામાં વપરાયેલી છરી પણ પોલીસે કબજે કરી છે. ગઇકાલે મેટોડામાં આરોપીઓએ અપહૃત મુકેશને છરીના ઘા ઝીંકતા તેને ઇજા થતા હાલ હોસ્પિટલમાં સારવાર આપવામાં આવી રહી છે. 

- ત્રણેય આરોપીઓ ગુનાઇત ઇતિહાસ ધરાવે છે

રાજકોટ: મુખ્ય સૂત્રધાર વિજય વિરૂધ્ધ કાલાવડ, શાપર અને રાજકોટમાં દારૂ, મારામારી સહિતના પાંચ ગુના નોંધાયેલા છે. ૨૦૧૯ અને ૨૦૨૨માં પાસાની હવા પણ ખાઇ આવ્યો છે. બીજા આરોપી સંજય વિરૂધ્ધ પણ બે ગુના અને ત્રીજા આરોપી સુરેશ વિરૂધ્ધ ૧૪ ગુના નોંધાયેલા છે.