ટેમ્પોની ટક્કરે બાઈક સવાર આણંદ શહેરના કિન્નરનું મોત

- વાસદ નેશનલ હાઈવે પર હોટેલ પાસે અકસ્માત

- કિન્નર પર ટેમ્પોના ટાયર ફરી વળ્યા : ગંભીર ઈજાગ્રસ્ત અડાસના યુવકને વડોદરા ખસેડાયો

અડાસ ગામની ઊંડી ખડકીના ફઝલભાઈ રૂપસીંગ અભેસીંગ પરમાર આણંદ શહેરના ગામડીવડ ખાતે રહેતા અને વાસદ ટોલ નાકા પાસે દક્ષિણા ઉઘરાવતા કિન્નર કિશન ઉર્ફે ક્રિષ્નાબેન પુનમભાઈ બારૈયા (ઉ.વ. ૩૫)ને છેલ્લાં કેટલાંય સમયથી ઓળખે છે. શનિવારે સવારે કિશન ઉર્ફે ક્રિષ્નાબેનનો ફોન આવતા પરોઢીયે ચાર વાગ્યે ફઝલભાઈ પરમાર લેવા માટે ગામડીવડ ખાતે આવ્યો હતો. દરમિયાન બંને બાઈક પર વાસદ આવતા હતા. ત્યારે વાસદ આઈ માતા હોટલ પાસેથી પસાર થતા પાછળથી પુરઝડપે ટેમ્પના ચાલકે ટક્કર મારી હતી. બાદમાં ટેમ્પો રોડ પર પડેલા કિન્નરના માથા અને પગ પરથી પસાર થતાં જ તેમનું ગંભીર ઈજાઓથી મોત નિપજ્યું હતું. અંધારાનો લાભ લઈ ચાલક ટેમ્પો લઈ ફરાર થઈ ગયો હતો. ગંભીર ઈજાગ્રસ્ત યુવકને આસપાસના લોકોએ તાત્કાલિક ગોત્રી હોસ્પિટલમાં સારવાર અર્થે ખસેડયો હતો. આ અંગે વાસદ પોલીસ સ્ટેશનમાં ટેમ્પા ચાલક વિરૂદ્ધ ફરિયાદ નોંધાવી હતી.