ટ્રેક્ટર પરથી પટકાતા બાળકીનું ટાયર નીચે ચગદાઈ જવાથી મોત

પિતાની બેદરકારીએ માસૂમ દીકરીનો જીવ લીધો

શ્રમજીવી દંપતી ટ્રેક્ટરમાં બાળકોને લઈને સે-૨૭ તરફ જઈ રહ્યું હતું તે દરમિયાન બનેલી ઘટના

આ ઘટના અંગે પોલીસ સૂત્રોમાંથી મળતી વિગતો પ્રમાણે મૂળ મધ્ય પ્રદેશના અને હાલ મજૂરી કામ અર્થે અહીં આવેલા સોમીલાબેન ચારેલે ફરિયાદ નોંધાવી હતી કે આજે વહેલી સવારે ૩થ૦૦ વાગ્યે તેઓ તેમના પતિ બાલુ પુનીયા ચારેલ અને ચાર બાળકો સાથે ટ્રેક્ટર પર બેસીને સેક્ટર-૨૭ તરફ જઈ રહ્યા હતા. દરમિયાન સેક્ટર-૨૪ સાઈબાબા ચાર રસ્તા પાસે રસ્તામાં આવેલા બમ્પ પર પતિએ ટ્રેક્ટરની ગતિ ધીમી કરવાને બદલે બેદરકારીથી ટ્રેક્ટર કુદાવ્યું હતું. બમ્પ પર ટ્રેક્ટર ઉછળતા બાજુમાં બેઠેલી ૬ વર્ષની દીકરી કલ્પાના સમતુલન ગુમાવી નીચે ફેંકાઈ ગઈ હતી. કમનસીબે, ટ્રેક્ટરનું પાછળનું ભારેખમ ટાયર બાળકીના માથા પરથી ફરી વળતા તેને ગંભીર ઈજાઓ થઈ હતી અને તેનું ઘટનાસ્થળે જ કમકમાટીભર્યું મોત નીપજ્યું હતું. અકસ્માત બાદ બાળકીને તાત્કાલિક ગાંધીનગર સિવિલ હોસ્પિટલ લઈ જવામાં આવી હતી, જ્યાં તબીબોએ તેને મૃત જાહેર કરી હતી. આ મામલે સેક્ટર-૨૧ પોલીસે મૃતક બાળકીની માતાની ફરિયાદના આધારે તેના પિતા બાલુ પુનીયા ચારેલ વિરુદ્ધ ગુનો નોંધી કાયદેસરની કાર્યવાહી હાથ ધરી છે.