12 વર્ષની બાળકીને 'બાબુ..સોના ..' કહી તેનાં શરીર સાથે અડપલાં કર્યાં

રાજકોટનાં પોલીસ હેડ ક્વાર્ટરમાં બનેલી ચોંકાવનારી ઘટના

ઘટના બાદ ભાગી ગયેલા અને હેડ ક્વાર્ટરમાં અમૂલ પાર્લર ધરાવતા ૫૪ વર્ષના નરાધમ શખ્સની ધરપકડ

રાજકોટ: રાજકોટ શહેર પોલીસ હેડ ક્વાર્ટર ખાતે અમુલ દૂધનું પાર્લર ધરાવતા ૫૪ વર્ષના હરેશ દોલાનુમલ ગેહાણી (રહે. જંકશન પ્લોટ કો.ઓપ. હાઉસિંગ સોસાયટી શેરી નં.૧)એ ૧૨ વર્ષની એક બાળકીનાં શરીર સાથે અડપલાં કર્યાનો ચોંકાવનારો બનાવ બહાર આવ્યો છે. પ્ર.નગર પોલીસે બાળકીના પિતાની ફરિયાદ પરથી ગુનો દાખલ કરી આરોપીની ધરપકડ કરી હતી.

પ્રાપ્ત માહિતી મુજબ ભોગ બનનાર બાળકી ગઇકાલે બપોરે હેડ ક્વાર્ટરમાં આવેલા જનરલ સ્ટોર (અમૂલ પાર્લર)માં દૂધ લેવા ગઇ હતી ત્યારે આરોપી હરેશે તેને પૂછ્યું કે કેમ થોડા દિવસથી દેખાતી નથી. આ પછી તેને બાબુ-સોના કહી દુકાનમાંથી ચ્યુઈંગમ અને લોલીપોપ આપી હતી. ભોગ બનનાર બાળકીએ તે લેવાની ના પાડતા દુકાનના પગથિયા પાસે જ તેનો હાથ પકડી લીધા બાદ તેના શરીરે અડપલાં કર્યા હતા. એટલું જ નહીં ગાલ ઉપર કિસ કરી લીધી હતી. આ પછી ભોગ બનનાર બાળકીને છોડી દીધી હતી. 

ઘરે જઇ તેણે માતાને આપવિતી કહી હતી. જેણે પતિને જાણ કરતાં તે સીધા પાર્લરે પહોંચી ગયા હતાં. તે વખતે આરોપી હરેશનો પુત્ર બેઠો હતો. જેને તેના પિતા ક્યાં છે તેમ પૂછી દુકાને બોલાવવાનું કહેતા કોલ લગાડયો હતો. કોલ ઉપર જ આરોપી હરેશે ભોગ બનનાર બાળકીના પિતાને કહ્યું કે મારી ભૂલ થઇ ગઇ છે, હું તમારી દીકરીની માફી માગુ છું.

ત્યાર પછી ભોગ બનનાર બાળકીના પિતાએ પ્ર.નગર પોલીસ મથકે જઇ ફરિયાદ નોંધાવી હતી. જેના આધારે પોલીસે ગુનો નોંધી આરોપી હરેશની ધરપકડ કરી તેને કાયદાનું ભાન કરાવ્યું હતું. પાર્લરે આરોપી હરેશ ઉપરાંત તેની પત્ની અને પુત્ર બેસે છે. ભોગ બનનાર બાળકીની ઉંમર કરતાં પણ તેનો પુત્ર મોટો છે. આમ છતાં વિકૃત મગજને કારણે આ કૃત્ય કર્યાનું તારણ નીકળ્યું છે. આ ઘટનાને કારણે સમગ્ર હેડ ક્વાર્ટરમાં રોષ ભભૂકી ઉઠયો હતો અને તેના ઉપર ફીટકાર વરસાવ્યો હતો.