મિકેનિકલની 60 તેમજ એરોસ્પેસની 30 બેઠકોની પ્રવેશના પહેલા રાઉન્ડમાં બાદબાકી

વડોદરાઃ એમ.એસ.યુનિવર્સિટીની ટેકનોલોજી ફેકલ્ટીની  મિકેનિકલ એન્જિનિયરિંગની ૬૦ તેમજ આ વર્ષથી શરુ કરાયેલા એરોસ્પેસ એન્જિનિયરિંગના કોર્સની ૩૦ એમ કુલ ૯૦ હાયર પેમેન્ટ બેઠકોની પહેલા રાઉન્ડની પ્રવેશ પ્રક્રિયામાંથી બાદબાકી થઈ ગઈ છે.

આ બેઠકો પર પહેલા રાઉન્ડમાં વિદ્યાર્થીઓને પ્રવેશ આપવામાં આવ્યો નથી.ગુજરાતમાં ધો.૧૨ પછી ડિગ્રી એન્જિનિયરિંગમાં પ્રવેશની કાર્યવાહી  એસીપીસી દ્વારા કરવામાં આવે છે.ટેકનોલોજી ફેકલ્ટીમાં મિકેનિકલ એન્જિનિયરિંગ વિભાગમાં આ વર્ષે  હાયર પેમેન્ટ કેટેગરીની ૬૦ બેઠકોનો ઉમેરો થયો છે.આ સાથે જ એરોસ્પેસ એન્જિનિયરિંગ પણ આ વર્ષથી શરુ કરાયું છે.જેમાં ૩૦ વિદ્યાર્થીઓને પ્રવેશ મળશે.

પહેલા રાઉન્ડની પ્રવેશ પ્રક્રિયામાં આ બેઠકો ઉપલબ્ધ જ નહીં હોવાથી તરેહ તરેહની અટકળો થઈ રહી છે.ઘણા વિદ્યાર્થીઓને તો ટેકનોલોજી ફેકલ્ટીમાં આ બેઠકો વધી છે તેની જાણ પણ નથી.એટલે પહેલા રાઉન્ડમાં વિદ્યાર્થીઓ તેમાં પ્રવેશથી વંચિત રહ્યા છે.બીજી તરફ યુનિવર્સિટી સત્તાધીશોનું કહેવું છે કે, એસીપીસી હેઠળ આ બેઠકો પર પ્રવેશ આપવા માટે સરકારના શિક્ષણ વિભાગની મંજૂરી જરુરી હોય છે.પહેલા રાઉન્ડની પ્રવેશ કાર્યવાહી શરુ થયા બાદ આ બેઠકો  માટે શિક્ષણ વિભાગની મંજૂરી મળી હોવાથી હવે બીજા રાઉન્ડમાં આ બેઠકો પર પ્રવેશ આપવામાં આવશે.

ઉલ્લેખનીય છે કે, કોમ્પ્યુટર વિભાગમાં પણ ગત વર્ષે ૬૦ હાયર પેમેન્ટ બેઠકોનો ઉેમરો કરાયો હતો.આમ બે વર્ષમાં ફેકલ્ટીમાં ડિગ્રી એન્જિનિયરિંગની ૧૫૦ બેઠકો વધારવામાં આવી છે.