ચેન્નાઈ ખાતે એશિયા માસ્ટર એથ્લેટિક્સ સ્પર્ધામાં એશિયાના 26 દેશના 3600 ખેલાડીઓએ ભાગ લીધો હતો :અન્ય એક મહિલાએ પણ ઊંચી કૂદમાં બ્રોન્ઝ મેડલ પ્રાપ્ત કર્યો
જૂનાગઢ, : ચેન્નાઈ ખાતે યોજાયેલી આંતરરાષ્ટ્રીય એશિયા માસ્ટર એથ્લેટીક્સ ચેમ્પીયનશીપમાં જૂનાગઢના 86 વર્ષિય મહિલાએ દોડ સ્પર્ધામાં ગોલ્ડ તથા સિલ્વર મેડલ મેળવ્યા હતા. જ્યારે અન્ય એક મહિલાએ ઉંચી કૂદમાં બ્રોન્ઝ મેડલ મેળવી ગુજરાત તથા જૂનાગઢને ગૌરવ અપાવ્યું હતું.
તાજેતરમાં ચેન્નાઈ ખાતે 23મી આંતરરાષ્ટ્રીય માસ્ટર એથ્લેટીક્સ ચેમ્પીયનશીપ 2025 યોજાઈ હતી. જેમાં એશિયાના 26 દેશના 3600 ખેલાડીઓએ ભાગ લીધો હતો. ગુજરાતના 92 તેમજ જૂનાગઢ જીલ્લામાંથી ભાનુમતીબેન પટેલ, વનીતાબેન ગોંડલીયા, આરૂશીબેન સોલંકી, પલ્કેશભાઈ સોલંકી, હિનાબેન વાજા, રાજુભાઈ ભટ્ટ, નુતનબેન માલવીયા, ડેનીશભાઈ ડાંગર, જસ્મીનભાઈ ડાંગર, ઈરફાનભાઈ ગરાળા, નારણભાઈ ગોજીયા તથા કરશનભાઈ રાઠોડે વિવિધ સ્પર્ધામાં ભાગ લીધો હતો. તેમાંથી 86 વર્ષિય ભાનુમતીબેન પટેલે 5,000 મીટર દોડ સ્પર્ધામાં ગોલ્ડ તેમજ 5,000 અને 1500 મીટર વોક સ્પર્ધામાં સિલ્વર મેડલ પ્રાપ્ત કર્યો હતો. જ્યારે નુતનબેન માલવીયાએ ઉંચી કૂદમાં બ્રોન્ઝ મેડલ મેળવી જૂનાગઢને ગૌરવ અપાવ્યું હતું. બંને મહિલાઓએ આંતરરાષ્ટ્રીય કક્ષાની ચેમ્પીયનશીપમાં મેડલ મેળવતા માસ્ટર એથ્લેટીક્સ એસો.ના પ્રમુખ, સિનીયર સિટીઝન મંડળના પ્રમુખે અભિનંદન આપ્યા હતા.
