સૌરાષ્ટ્રના 141 જળાશયોમાં 75 ટકા પાણીઃ 22 ડેમ એલર્ટ, 52 હાઈએલર્ટ

ચાલુ ચોમાસે મેઘમહેર 80 ટકાને ઓળંગી જતાં પાક-પાણીનું ચિત્ર ઉજળું

40 ડેમ 100 ટકા ભરાઈ ગયા, 2588 એમસીએફટી ક્ષામતા સામે જળાશયોમાં 1938 એમસીએફટી પાણી ઠલવાયુંઃ અનેક ડેમના દરવાજા ખોલાતાં હેઠવાસના ગામોને ચેતવણી

સૌરાષ્ટ્રમાં ચાલુ ચોમાસે અત્યાર સુધીમાં ૮૦ ટકાને વરસાદ ઓળંગી ગયો છે, જેથી પાક-પાણીનું ચિત્ર ઉજળું બન્યું છે. એક સમયે વરસાદ ખેંચાતા ધરતીપુત્રો પર ચિંતાના વાદળો ઘેરાયા હતા, જે છેલ્લા એક સપ્તાહથી મેઘમહેરના કારણે  વિખેરાઈ ગયા છે. હાલ સૌરાષ્ટ્રના ૪૦ ડેમ ૧૦૦ ટકા ભરાઈ ગયા છે. તમામ ૧૪૧ ડેમમાં પાણીની સંગ્રહ શક્તિ રપ૮૮ એમસીએફટી છે, જેમાં હાલ ૧૯૩૮ એમસીએફટી પાણી આવી ગયું છે, આમ ૭૪.૯૦ ટકા જળરાશી આવી ગઈ છે. હજુ, પણ પાણીની પુષ્કળ આવક ચાલુ હોવાથી અનેક ડેમના દરવાજા ખોલીને હેઠવાસના ગામોને સાવચેત કરવામાં આવ્યા છે. 

સૌથી વધુ રાજકોટ જિલ્લામાં ર૮ જળાશયો છે, જેમાં ૬૮ ટકા જળસંગ્રહ થઈ ગયો છે. અન્ય ૧૦ જિલ્લામાં સૌથી વધં ભાવનગર જિલ્લાનાં ૧ર ડેમમાં ૯૮.૭૩ ટા તો સૌથી ઓછું મોરબી જિલ્લાના ૧૦ ડેમમાં પ૯.૯૧ ટકા પાણી છે, જોકે, હજુ આજથી જ ભાદરવો મહિનો ચાલુ થયો છે અને એક સપ્તાહ ધીંગી મેઘમહેરની  આગાહી પણ કરવામાં આવી છે, એટલે સૌરાષ્ટ્રના મોટાભાગના જળાશયો છલકાઈ જશે એવી આશા છે.