જૂનાગઢ જિલ્લામાં વર્ષ 2018 બાદ નવી મંડળી બનાવવાનો રાફડો ફાટયો : JDCC બેંક- યાર્ડની ચૂંટણી પૂર્વે ભાજપના આદર્શવાદીઓમાં ગાજતો મુદ્દોઃ બોગસ મંડળીના આધારે સહકારી સંસ્થાનો કબ્જો મેળવી કરોડોનો ભ્રષ્ટાચાર આચરાયાના આક્ષેપ
જૂનાગઢ, : જૂનાગઢ જિલ્લા સહકારી બેંકના ડિરેક્ટરોની મુદ્દત પૂર્ણ થયાને ત્રણ-ચાર માસ થઈ ગયા છે. તેવી જ રીતે ૧૦-૧ર દિવસ બાદ જૂનાગઢ યાર્ડની કમિટીની મુદ્દત પૂર્ણ થઈ રહી છે. આ બંને સહકારી સંસ્થાઓની ચૂંટણી યોજાય તે પહેલા બોગસ મંડળીનો મુદ્દો ગરમાયો છે. ભાજપના આગેવાને સહકારી વિભાગના નિયમોને નેવે મુકી બોગસ મંડળીઓ બનાવી લીધી હોવાનો ગણગણાટ પરાકાષ્ઠાએ પહોંચ્યો છે. આ બંને સહકારી સંસ્થાઓમાં નિયમોને બદલે ઘરની પેઢી જેવો વહીવટ ચાલી રહ્યો છે. સહકારી ક્ષેત્રના કેટલાક આગેવાનોમાં જ થતી ચર્ચામાં તથ્ય હોય તો બોગસ મંડળીઓના આધારે સહકારી સંસ્થાઓ પર કબ્જો જમાવી દેવાયો હતો, હવે ફરીવાર કબ્જો ન જમાવી લેવાય તે માટે ભાજપનું જ એક જૂથ સક્રિય બન્યું છે.
સહકારી ક્ષેત્ર એ પૈસા બનાવવાનું કારખાનું હોય તેમ ભરતીના નામે, બીજા વિકાસના કામના નામે કરોડો રૂપિયાનો ભ્રષ્ટાચાર આચરી ખિસ્સા ભરી લેવાયાની ચર્ચા છે. તદ્દનુસાર, જિલ્લા સહકારી બેંક અને જૂનાગઢ માર્કેટીંગ યાર્ડની ગત ચૂંટણી વખતથી બોગસ મંડળીનો રાફડો ફાટયો અને સહકારી ક્ષેત્રમાં જુના જોગીઓ હતા તેને ઘરે બેસાડી દેવાયા છે. માર્કેટીંગ યાર્ડની ગત ચૂંટણી પહેલા યાર્ડમાં ૮થી ૧૦ કરોડ રૂપિયાની બેલેન્સ હતી. હાલમાં યાર્ડની તમામ બેલેન્સનો વિકાસ થઈ ગયો છે. માર્કેટીંગ યાર્ડની મુદ્દત પૂર્ણ થાય તેના 90 દિવસ પહેલા ચૂંટણી પ્રક્રિયા શરૂ થઈ જાય છે. મુદ્દત પુરી થાય તે પહેલા નવી બોડી અસ્તિત્વમાં આવી જાય છે. તા. 30-11ના યાર્ડની મુદ્દત પુરી થતી હોવા છતાં હજુ સુધી કોઈપણ જાતની ચૂંટણીની પ્રક્રિયા કરવામાં આવતી નથી. તેવી જ રીતે બેંકની ટર્મમાં અનેક કર્મચારીઓની ભરતી કરવામાં આવી અને આ ભરતીમાં મોટી રકમ લેવામાં આવી હોવાના આક્ષેપો ઉઠયા છે. જેડીસીસી બેંકની મુદ્દત પૂર્ણ થઈ ગઈ હોવાથી ત્યાં ખરા અર્થમાં કસ્ટોડીયનને વહીવટ સોંપી દેવામાં આવે છે પરંતુ હજુ જુની બોડીને કાર્યરત રાખવામાં આવી છે.
