IELTS Coaching Centers Gujarat: 2025ના પ્રથમ ત્રણ-ચાર મહિનામાં જ ગુજરાતમાં આશરે 600 IELTS કોચિંગ સેન્ટર્સ બંધ થઈ ગયા છે. ગુજરાતમાં IELTSની સૌથી મોટી અસર કોચિંગ હબ અમદાવાદ પર પડી છે. કેનેડાના વિઝાના નિયમો કડક થતાં 41 ટકા અરજીઓમાં ઘટાડો થયો છે.
ગુજરાતથી વિદેશ જતાં વિદ્યાર્થીઓમાં પણ 40 ટકા અરજીઓનો ઘટાડો થતાં IELTS પર માઠી અસર પડી છે. બંધ થવાના મુખ્ય કારણોમાં કેનેડા, અમેરિકા, બ્રિટન અને ઓસ્ટ્રેલિયાના સખત વિઝા નિયમો ખાસ કરીને કેનેડાએ આંતરરાષ્ટ્રીય વિદ્યાર્થીઓની સંખ્યા પર કેપ લગાવી દીધી છે. બીજું હવે મોટા ભાગના વિદ્યાર્થીઓ સેલ્ફ-સ્ટડી પસંદ કરે છે.
જેમાં તે YouTube, ઓનલાઇન કોર્સ, ફ્રી મટિરિયલ્સનો ઉપયોગ વધુ કરતાં હોવાથી સંખ્યાબંધ IELTS કોચિંગ પર અસર થઈ છે. ઘણાં કોચિંગ સેન્ટર્સ ઓનલાઇન મોડલ પર શિફ્ટ થયા, હોવાથી પણ ફિઝિકલ મોડેલને અસર થવા પામી છે. અમદાવાદમાં પહેલા 100થી વધુ મોટા-નાના IELTS કોચિંગ સેન્ટર્સ હતા જેમાંના હવે ઘણા સેન્ટર્સના બોર્ડ ઉતારવામાં આવ્યા છે અથવા તો તેઓ માત્ર ઓનલાઇન ક્લાસ ચલાવી રહ્યા છે.
હાલમાં ભાષાઓ શીખવા માટે લોકો ઓનલાઇન ઍપ્લિકેશનોનો ઉપયોગ કરતાં હોવાથી સીધી અસર IELTS પર પડી છે. સેલ્ફ સ્ટડી કરતાં એક ગ્રૂપ દ્વારા એવું પણ જાણવા મળ્યું છે કે IELTSનો બિઝનેસ સીધો એજન્ટો સાથે સંકળાયેલો હતો. એક એજન્ટ નબળા વિદ્યાર્થીઓ પાસે IELTSની ફી અને વિદેશની કૉલેજની ફીમાંથી કમિશનો મેળવતા હતા. હાલમાં ડુપ્લિકેટ કૉલેજો પર તવાઈ આવવાથી તેની સીધી અસર એજન્ટો અને IELTS પર થવા પામી છે.
એક દશક પહેલાં ગુજરાતના અમદાવાદ, વડોદરા, સુરત અને રાજકોટમાં પાંચ હજારથી પણ વધુ IELTSના કોચિંગ ક્લાસિસ હતા. જેમાંથી હવે માંડ દસ ટકા ક્લાસીસ સક્રિય રહ્યા છે. જો કે ગુજરાતના નાના શહેરોમાં હજુ પણ કેટલીક જગ્યાએ વિદેશ વાંછુઓ સેલ્ફ સ્ટડી ના કરી શકતા હોવાથી IELTS ક્લાસીસની મદદ લઈ રહ્યા છે. IELTSના કારણે એજન્ટોનો ધંધો વધુ ધીકતો હતો જેની સીધી અસર પડી છે.
