ગુજરાતમાં વર્ષે 6.36 લાખ ટન લિંબુનો પાક, પખવાડિયામાં 50 ટકા ભાવ ઘટયા

ચાલુ વર્ષે પણ લિંબુનું મબલખ ઉત્પાદન જળવાઈ રહેવાની શક્યતા 

દેશમાં વર્ષે 38 લાખ ટનથી વધુ લિંબુ પાકે છે, પ્રથમ ક્રમે આંધ્રમાં ઉત્પાદન વધ્યું જ્યારે બીજા ક્રમે ગુજરાતમાં ઉત્પાદન એકંદરે સ્થિર 

રાજકોટ: શાક-દાળ સહિત અનેક વાનગીમાં રોજિંદા વપરાશના લિંબુના એક સમયે દાંત ખાટા કરી દે તેવા ભાવ પહોંચી ગયા બાદ હવે જૂલાઈ-ઓગષ્ટ વાવણીની સીઝન શરુ થઈ છે અને સાનુકૂળ વરસાદ વરસી રહ્યો છે ત્યારે પખવાડિયામાં આશરે પચાસ ટકા ભાવ ઘટી ગયા છે અને આજ યાર્ડમાં ન્યુનત્તમ રૂ।.૫થી રૂ।.૨૫ના કિલો લેખે સોદા પડયા હતા. જો કે છૂટક બજારમાં વિણાંટ કરીને તેના બમણાંથી ત્રણ ગણા ભાવ લેવાય છે. 

સમગ્ર દેશમાં લિંબુનું ઉત્પાદન છેલ્લા પાંચ વર્ષથી આંશિક વધારા સાથે સારુ થતું રહ્યું છે. દેશનું સૌથી વધારે ૨૩થી ૨૪ ટકા લિંબુ પકવતા રાજ્ય આંધ્રપ્રદેશમાં ઈ.સ.૨૦૨૧-૨૧થી ઉત્પાદન આશરે ૨ લાખ ટન વધી ગયું છે.  જ્યારે બીજા ક્રમે દેશનું ૧૬થી ૧૭ ટકા લિંબુ પકવતા ગુજરાતમાં ૬.૩૬ લાખ ટનનું ઉત્પાદન એકંદરે જળવાઈ રહ્યું છે. 

ઈ.સ.૨૦૨૫ના અનુમાન મૂજબ પણ ગુજરાત સહિત દેશમાં લિંબુ ઉત્પાદન જળવાઈની રહ્યું છે અને ઈ.સ.૨૦૨૫-૨૬માં પણ મબલખ ઉત્પાદનની આશા સેવાય છે. પોટેશિયમ, ડાયેટરી ફાઈબર સહિત ન્યુટ્રીશિયન વેલ્યુ ધરાવતા લિંબુને એકાદ વર્ષ સાચવી શકાતા હોવાથી વાવણી ચોમાસામાં અને પાક શિયાળાના આંરભે બજારમાં આવતો હોવા છતાં વર્ષ દરમિયાન તેની સપ્લાય જળવાતી હોય છે.