સેમિકન્ડક્ટર હબ સાણંદમાં ઉદ્યોગોને મળશે લક્ઝરી સુવિધા: 5-સ્ટાર હોટલ માટે પ્લોટની ફાળવણી, જાણો શું છે સરકારનો પ્લાન

Sanand GIDC Luxury Hotel Plot Auction : ગુજરાતના ઔદ્યોગિક હબ તરીકે ઉભરી રહેલા સાણંદમાં માળખાગત સુવિધાઓમાં મોટો વધારો થવા જઈ રહ્યો છે. સાણંદ-2 ઔદ્યોગિક વસાહતમાં કાર્યરત નેશનલ અને મલ્ટીનેશનલ કંપનીઓની જરૂરિયાતને ધ્યાને રાખીને રાજ્ય સરકાર દ્વારા પ્રીમિયમ હોટલ માટે ફાળવવામાં આવેલા પ્લોટની હરાજી પ્રક્રિયા સફળતાપૂર્વક પૂર્ણ કરવામાં આવી છે.

5 એકરમાં આકાર લેશે લક્ઝરી હોટલ

સાણંદ જીઆઈડીસીમાં અંદાજિત 20,168 ચોરસ મીટર એટલે કે 5 એકર જેટલી વિશાળ જમીન હોટલ નિર્માણ માટે અનામત રાખવામાં આવી હતી. 22 ડિસેમ્બર 2025ના રોજ પૂર્ણ થયેલી ઈ-હરાજીમાં મહત્તમ બીડ લગાવનાર ડેવલપરને આ પ્લોટની ફાળવણી કરી દેવામાં આવી છે. અહીં 3 થી 5 સ્ટાર કેટેગરીની હોટલ બનાવવાની રહેશે, જેના માટે કંપનીને 4 વર્ષનો સમયગાળો (મોરિટોરિયમ પીરિયડ) આપવામાં આવ્યો છે. ઉલ્લેખનીય છે કે, સાણંદ જીઆઈડીસીની 3 કિમીની ત્રિજ્યામાં અન્ય એક ફાઈવ સ્ટાર હોટલની કામગીરી પણ અત્યારે પૂરજોશમાં ચાલી રહી છે.

વૈશ્વિક ડેલિગેટ્સ માટે આશીર્વાદરૂપ બનશે સુવિધા

આગામી 28 ફેબ્રુઆરી 2026ના રોજ વડાપ્રધાન નરેન્દ્ર મોદી જ્યારે માઇક્રોન ટેક્નોલોજીના સેમિકન્ડક્ટર પ્લાન્ટનો શુભારંભ કરાવવા જઈ રહ્યા છે, ત્યારે સાણંદમાં વૈશ્વિક પ્રતિનિધિઓ અને મલ્ટીનેશનલ કંપનીઓના ડેલિગેટ્સની અવરજવર વધશે. આ પ્રીમિયમ હોટલના નિર્માણથી અહીં આવતા વિદેશી મહેમાનો અને ઉચ્ચ અધિકારીઓને રહેવા માટે આંતરરાષ્ટ્રીય સ્તરની સુવિધાઓ ઘરઆંગણે જ મળી રહેશે.

આ પણ વાંચો: સાણંદમાં ₹22,516 કરોડના ખર્ચે માઇક્રોનનો સેમિકન્ડક્ટર પ્લાન્ટ તૈયાર, જાણો કેવી રીતે બનશે ચિપ

1150 એકમો અને મહિલા પાર્ક સાથે સાણંદનો વિકાસ

હાલમાં સાણંદ ઔદ્યોગિક વસાહતમાં 1150 જેટલા વિવિધ ઔદ્યોગિક એકમો ધમધમી રહ્યા છે. અહીં માત્ર ઈન્ફ્રાસ્ટ્રક્ચર જ નહીં પરંતુ સામાજિક સશક્તિકરણ પર પણ ભાર મૂકવામાં આવ્યો છે, જેના ભાગરૂપે સ્પેશિયલ મહિલા ઔદ્યોગિક પાર્ક પણ બનાવવામાં આવ્યો છે. 'ઈઝ ઓફ ડુઈંગ બિઝનેસ' નીતિને કારણે સાણંદમાં ઝડપી કનેક્ટિવિટી અને અદ્યતન સુવિધાઓ ઉપલબ્ધ બની રહી છે, જે સેમિકન્ડક્ટર અને ઓટોમોબાઈલ જેવા ક્ષેત્રો માટે ગ્લોબલ ડેસ્ટિનેશન બની રહ્યું છે.