ટ્રેનમાં મફતની મુસાફરી કરતા 42,472 ખુદાબક્ષો પકડાયા

ભાવનગર રેલવે મંડળની ટિકિટ ચેકિંગ ટીમે પાંચ માસમાં કાર્યવાહી કરી

ટિકિટ વિના અને અનઅધિકૃત ટિકિટ સાથે યાત્રા કરતા લોકો પાસેથી રૂા.૨,૭૧ કરોડનો દંડ વસૂલ્યો

ભાવનગર રેલવે મંડળ દ્વારા એપ્રિલથી ઓગસ્ટ માસ દરમિયાન હાથ ધરાયેલી ટિકિટ ચેકિંગ કામગીરીમાં સૌથી વધુ એપ્રિલ અને મે માસમાં ખુદાબક્ષ મુસાફરોને શોધી કાઢવામાં આવ્યા હતા. આ બે માસમાં જ રેલવેએ દંડ પેટે દોઢ આસપાસની રકમ વસૂલી હતી. જૂન, જુલાઈ અને ઓગસ્ટમાં પણ ચેકિંગની કડક કાર્યવાહી હાથ ધરવામાં આવી હતી. જેના પરિણામ સ્વરૂપ વર્ષ ૨૦૨૪-૨૦૨૫ના એપ્રિલથી ઓગસ્ટ માસમાં ૨૬,૬૫૫ની તુલનામાં ૪૨,૪૭૨ ખુદાબક્ષ મુસાફરો પકડાયા હતા. ગત વર્ષે પાંચ માસ (એપ્રિલથી ઓગસ્ટ)માં રેલવેએ રૂા.૧,૮૧,૧૧,૫૬૩નો દંડ વસૂલ્યો હતો. તેની સામે આ વર્ષે દંડ પેટે રૂા.૨,૭૧,૬૨,૯૫૫ની રકમ રેલવેની તિજોરીમાં જમા થઈ છે.