ગુજરાતમાં છેલ્લા આઠ વર્ષમાં પોક્સો એક્ટ હેઠળ નોંધાતા ગુનાઓમાં 398.5%નો વધારો

અમદાવાદ, 19 ફેબ્રુઆરી 2023 રવિવાર

ગુજરાતમાં છેલ્લા આઠ વર્ષમાં પોક્સો હેઠલ નોંધાતા ગુનાઓમાં 398.4 ટકાનો વધારો થયો છે. જેમાં આઠ વર્ષમાં 14522 ગુના નોંધાયા છે. આ ગુનાઓમાં સજા આપવાનો દર જોઈએ તો માત્ર 1.59 ટકા હોવાનો કોંગ્રેસે આક્ષેપ કર્યો છે. કોંગ્રેસે એવો પણ આક્ષેપ કર્યો છે કે, 14522માંથી માત્ર 231 કેસમાં જ ગુના પુરવાર થઈ શક્યા છે જ્યારે 12 હજારથી વધુ કેસ હજી પેન્ડિંગ છે. 

ગુજરાત કોંગ્રેસના પ્રવક્તા પાર્થિવરાજસિંહએ જણાવ્યું હતું કે, લોકસભામાં રજુ કરવામાં આવેલા આંકડા પ્રમાણે પોક્સોના કાયદા હેઠળ ગુજરાતમાં વર્ષ 2014થી 2021 સુધીમાં 14522 કેસ નોંધાયા છે. 2014માં 613 ગુનાઓ નોંધાયા જેમાં 5 કેસમાં સજા પડેલ હતી. 2015માં પોક્સો હેઠળ 1609 ગુના નોંધાયા હતા, જેમાં 8 કેસમાં સજા પડેલ હતી. વર્ષ 2016 માં 1408 ગુના નોંધાયા હતા, જેમાં 5 કેસમાં સજા પડેલ હતી. વર્ષ 2017માં 1697 ગુના નોંધાયા હતા જેમાં 12 કેસમાં સજા પડેલ હતી. વર્ષ 2018 માં 2154 કેસ નોંધાયા જેમાં 33 કેસમાં સજા થયેલ હતી. વર્ષ 2019માં 2253 કેસમાં 74 કેસ, વર્ષ 2020 માં 2345 કેસમાં 23 કેસમાં અને વર્ષ 2021માં 71 કેસમાં સજા થયેલ હતી.

ગુજરાત રાજ્યમાં પોકસો હેઠળ 14522 ગુનામાં 231 કેસમાં ગુનો પુરવાર થઈ શક્યા હતા. વર્ષ 2021ના અંત સુધી માં 12647 કેસ પેન્ડિંગ છે નો આંકડો જાણવા મળે છે. "બેટી બચાઓ બેટી પઢાઓ"ની જાહેરાતો પાછળ કરોડોના ખર્ચા કરાયા પણ આ દીકરીઓને ન્યાય અપાવવામાં સરકાર નિષ્ફળ ગઈ છે તે આ આંકડા પુરવાર કરે છે. નાની બાળકીઓ ઉપર વધતી દુષ્કર્મ શારીરિક છેડછાડના ગુનાઓમાં બેફામ વધારો ગુજરાતની અસ્મિતાને શરમાવે તેમ છે. લોકસભાના આંકડાઓ દર્શાવે છે કે બેન દીકરીની સુરક્ષામાં સરકાર નિષ્ફળ ગઈ છે.