સમય મર્યાદામાં સાધનોની ખરાઇ નહીં કરાવનાર જિલ્લાના 39 વેપારી દંડાયા

- 232 વેપારીઓએ 385 સાધનોની ચકાસણી કરાવી

- વાર્ષિક, દ્વિ-વાર્ષિક વેપારીઓએ મુન્દ્રાકન ફી પેટે 2.97 લાખ ચુકવ્યા : 42 કેસમાં 42,500 નો દંડ

ગ્રાહકોની સુરક્ષા માટે કાર્યરત જિલ્લા તોલમાપ કચેરી દ્વારા નિયમિતપણે મોબાઇલ ચેકીંગ ડ્રાઇવ ગોઠવવામાં આવે છે. જિલ્લાના પાલિતાણા, ભાવનગર, તળાજા, મહુવા, ગારિયાધાર વગેરે સ્થળોએ વેપારીના વજન-માપ સાધનો નિયમ પ્રમાણે છે અને ગ્રાહકોને ઓછુ વજન-માપ નથી મળતું ને તેનું ચેકીંગ કરાતું હોય છે. ગત એપ્રિલ માસ અંતર્ગત વિવિધ ચેકીંગ દરમિયાન વજન માપના કુલ ૩૯ કેસ કરી ૩૪૫૦૦ દંડ ફટકારાયો હતો. જ્યારે પીસીઆરના ૩ કેસ કરી ૮૦૦૦ દંટ ફટકારવામાં આવ્યો હોવાનું જણાયું છે. જ્યારે તમામ વેપારીને વાર્ષિક કે દ્વિ-વાર્ષિક પોતાના વજન-માપ સાધનોનું નિરીક્ષણ કરાવવાનું હોય છે જે મુજબ જિલ્લાના કુલ ૨૩૨ વેપારીઓએ પોતાના ૩૮૫ ઇલેક્ટ્રીક અને મેકેનીકલ વજન-માપ સાધનોની મુદ્રાંકન ચકાસણી કરાવી હતી જેની ફી પેટે તંત્રને રૂા.૨,૯૭,૪૨૦ની આવક નોંધાઇ છે. જ્યારે ઘણા વેપારી પોતાના વજન-માપ સાધનોની ખરાઇ ન કરાવતા હોય તેને પણ તોલમાપ ઇન્સપેક્ટર દ્વારા ચેકીંગ દરમિયાન કેસ કરી દંડ-માંડવાળ ફી વસૂલ કરતા હોય છે. જ્યારે ઉક્ત ૩૯ કેસમાં કરીયાણા, સોની, શાકભાજી, વે બ્રીજ અને પેટ્રોલ પંપનો પણ સમાવેશ થાય છે.